Prokuror polkovnik-leytenanta cəza istədi

Bakı Ağır Cinayətlər Məhkəməsində rüşvət almaqda ittiham olunan Dövlət Gömrük İdarəsinin keçmiş əməkdaşı, polkovnik-leytenant Namiq Əsədovun cinayət işi üzrə növbəti məhkəmə prosesi keçirilib.

Virtualaz.org-un xəbərinə görə, N.Əsədov Baş Gömrük İdarəsinin Gömrük prosedurları və ödənişləri şöbəsinin böyük inspektoru vəzifəsində işləyib. O, 350 manat rüşvət almaqda təqsirləndirilib.

Məhkəmə prosesində dövlət ittihamçısı çıxış edərək N.Əsədovun 5 il müddətinə azadlıqdan məhrum edilməsini istəyib. İttihama görə, N.Əsədov "Bakıyük" MMC-nin meneceri Rüfət Ağayevdən rüşvət alıb. Bu pulla o, Almaniyadan "Liebherr-Azeri LLC" MMC-yə göndərilən malların (kranlar üçün yağ) gömrük rəsmiləşməsini tezləşdirəcəkmiş. Menecer tələb olunan pulu verməyə razılaşıb, amma sonradan Gömrük İdarəsinə şikayət edib.