“Dəniz təməl komando kursu”nun buraxılış mərasimi olub - VİDEO

Hərbi Dəniz Qüvvələrinin (HQD)  "Dəniz təməl komando kursu”nun növbəti heyətinin buraxılış mərasimi keçirilib.

Bu barədə Müdafiə Nazirliyindən məlumat verilib.

HDQ-nin hərbi hissəsində keçirilən tədbirdə əvvəlcə ümummilli lider Heydər Əliyevin və şəhidlərin xatirəsi bir dəqiqəlik sükutla yad edilib. Azərbaycan Respublikasının Dövlət Himni səsləndirilib.

Mərasimdə çıxış edən Hərbi Dəniz Qüvvələrinin komandanı kontr-admiral Sübhan Bəkirov məzunları təbrik edib, onlara gələcək xidmətlərində uğurlar arzulayıb. O, qeyd edib ki, Azərbaycan Ordusunun tərkib hissəsi olan Hərbi Dəniz Qüvvələri ölkənin suverenliyi və ərazi bütövlüyü uğrunda İkinci Qarabağ müharibəsində rəşadətlə iştirak edərək bir daha sübut etdi ki, təcrübəli hərbçilər dənizdə olduğu kimi quruda da mühüm tapşırıqları müvəffəqiyyətlə yerinə yetirməyə qadirdirlər.

Sonra kurs birincisi tərəfindən rəmzi yaş kötüyünə emblem vurulub və məzunlara sertifikatlar təqdim edilib. Kursda fərqlənən hərbi qulluqçular və təlimatçılar fəxri fərman və qiymətli hədiyyələrlə mükafatlandırılıb.