Şahnaz Bəylərqızı 3 ay 15 gün müddətinə həbs edilib

Şahnaz Bəylərqızı fevralın 5də saxlanılıb. Elə həmin gün onun evində axtarış keçirilib.  O, Cinayət Məcəlləsinin qaçaqmalçılıq maddəsi ilə ittiham olunur.

 

Şahnaz Bəylərqızı jurnalist karyerasına "Yeni Müsavat" qəzetindən başlayıb, daha sonra  Azadlıq radiosunda çalışıb. Son iş yeri Toplum TV olub. 

"Toplum TV" internet televiziyasının yerləşdiyi ofisdə və daha bir neçə ünvanda Daxili İşlər Nazirliyi tərəfindən əməliyyat keçirilib. DİN-in yaydığı məlumatda bildirilib ki, paytaxtın Nərimanov rayonu Çəmənzəminli ev 98 B ünvanında yerləşən ofisdə və əlavə digər ünvanlarda bir qrup şəxsin fəaliyyəti ilə bağlı daxil olan məlumat üzrə polis əməkdaşları tərəfindən əməliyyat-axtarış tədbirləri keçirilib. Akif Qurbanov, Ələsgər Məmmədli və daha bir neçə nəfər saxlanılıb.

Onlara qarşı Cinayət Məcəlləsinin 206.3.2 (qaçaqmalçılıq qabaqcadan əlbir olan bir qrup şəxs tərəfindən törədildikdə) maddəsi ilə cinayət işi açılıb.

 

Şahnaz Bəylərqızı  daha çox cəmiyyətdə müstəqil, obyektiv və hər hansı mövge sərgiləməyən jurnalist kimi tanınıb. 

 

Onun himayəsində iki yeniyetmə yaşlı övladı var.