Ermənistan silahlanacaq və Konstitusiyasını dəyişməyəcək - Paşinyan

O, xüsusilə Ermənistanın ATƏT-in Minsk Qrupunun buraxılmasına razı olduğunu bildirib.

"Biz Minsk Qrupunun buraxılmasının Azərbaycan üçün də eyni məna daşıdığına və bunun yeni bir münaqişənin başlanğıcı olmayacağına əmin olmaq istəyirik", –  Paşinyan vurğulayıb.

Onun sözlərinə görə, rəsmi İrəvanın Azərbaycan tərəfinin yeni ərazi iddiaları ola biləcəyinə dair əsasları var və bunu "Qərbi Azərbaycan" ritorikası ilə əlaqələndirib.

"Bu, Ermənistanın ərazi bütövlüyünə birbaşa təhdiddir", –  o qeyd edib.

Paşinyan həmçinin Azərbaycanın Ermənistan Konstitusiyasını dəyişdirmək tələbi ilə bağlı mövqeyini açıqlayıb.

"Ermənistan Konstitusiya Məhkəməsi təsdiq edib ki, bizim Konstitusiyamızda Azərbaycana qarşı heç bir ərazi iddiası yoxdur", – o bildirib.

Onun sözlərinə görə, razılaşdırılmış sülh müqaviləsinin mətni bu məsələləri tamamilə həll edir və saziş imzalandığı halda Bakının Ermənistan Konstitusiyası ilə bağlı narahatlığı aradan qalxacaq.

Paşinyan bəyan edib ki, Ermənistan digər suveren ölkələr kimi ordusunu qoruyacaq və onun əsas vəzifəsi ölkənin təhlükəsizliyini təmin etmək olacaq.

"Ermənistanın bəzi əraziləri hazırda nəzarətimizdə deyil, lakin biz bu əraziləri hərbi yolla qaytarmağa çalışmayacağıq. Çünki bu məsələ sərhədin delimitasiyası və Almatı Bəyannaməsinə əsasən həll edilməlidir", – o bildirib.