Bayramov: Azad ərazilərdə kütləvi məskunlaşma başlayacaq

2027-ci ildə işğaldan azad edilmiş ərazilərdə kütləvi məskunlaşma planlaşdırılır. Hər bir keçmiş məcburi köçkünə öz ata-baba yurdunda ev təklif ediləcək. Bunu deputat Vüqar Bayramov Milli Məclisdə çıxışı zamanı bildirib.

Onun sözlərinə görə, hazırda işğaldan azad edilmiş ərazilərdə 100 minə yaxın Azərbaycan vətəndaşı yaşayır, işləyir və təhsil alır. Onlardan 41 213 nəfəri daimi məskunlaşan keçmiş məcburi köçkünlərdir.

Ən çox məskunlaşma Ağdam rayonunda qeydə alınıb. Hazırda rayonda 8 300 nəfər yaşayır. Cəbrayıl rayonuna isə 7 112 keçmiş məcburi köçkün qayıdıb.

Vüqar Bayramov bildirib ki, infrastrukturun qurulması ərazilərdə məskunlaşmanın genişlənməsinə şərait yaradır. Heç bir keçmiş məcburi köçkün bu prosesdən kənarda qalmayacaq.

O qeyd edib ki, Prezident İlham Əliyev işğaldan azad edilmiş ərazilərə indiyədək 600 dəfədən çox səfər edib. Bu səfərlər çərçivəsində 180-dən çox layihənin təməli qoyulub, 170-dən çox obyektin açılışı olub.

Qarabağ və Şərqi Zəngəzurun iqtisadiyyatı böyüyüb

Vüqar Bayramovun sözlərinə görə, Zəfərdən sonra Qarabağ iqtisadi rayonunda məhsulun ümumi buraxılışı 4 dəfə artaraq 6 milyard manata çatıb. 2020-ci ildə bu göstərici 1 milyard 548 milyon manat olub.

Şərqi Zəngəzur iqtisadi rayonunda isə məhsulun ümumi buraxılışı 30 dəfə artaraq 4 milyard manatı ötüb. 2020-ci ildə bu rəqəm 134 milyon manat təşkil edib.

Hazırda regionda sənaye məhsulunun həcmi 100 milyon manata, aqrar sektorun həcmi isə 170 milyon manatdan çoxa çatıb.