Paşinyan: TRIPP layihəsində işlər başlayır

Ermənistan hökuməti ABŞ Prezidenti Donald Trampın təşəbbüsü ilə gündəmə gələn “Beynəlxalq Sülh və Rifaha Doğru Tramp Yolu” (TRIPP) layihəsi çərçivəsində dəmir yolu, avtomobil yolu və elektrik xətlərinin layihələndirilməsi işlərinə başlayıb.

Ermənistanın Baş naziri Nikol Paşinyan bunu noyabrın 2-də parlamentin daimi komitələrinin birgə iclasında 2027-ci il dövlət büdcəsi layihəsinin müzakirəsi zamanı bildirib.

Paşinyan qeyd edib ki, Ermənistan hökuməti TRIPP layihəsinin inkişaf şirkəti yaradılmadan əvvəl öz təşəbbüsü ilə layihələndirmə işlərinə sifariş verəcək.

“Biz vaxt itirmək istəmirik. TRIPP inkişaf şirkəti yaradılan kimi, Ermənistan hökuməti artıq tamamlanmış işləri ona təhvil verəcək”, – baş nazir bildirib.

Paşinyanın sözlərinə görə, layihənin həyata keçirilməsi Ermənistanın 30 ildən çox davam edən blokadanadan çıxmasına imkan verəcək.

O vurğulayıb ki, TRIPP Ermənistanın həm Şərq-Qərb, həm də Şimal-Cənub istiqamətlərində maneələri aradan qaldırmasına şərait yaradacaq.

Baş nazirin sözlərinə görə, layihəyə Nrnadzor-Karçevan dəmir yolu, elektrik xətləri və avtomobil yolu daxil olacaq. Qaz və neft boru kəmərləri ilə bağlı məsələlər isə daha sonra müzakirə ediləcək.

TRIPP Ermənistan və ABŞ arasında regional nəqliyyat bağlantılarının inkişafı məqsədilə nəzərdə tutulan layihədir. Paşinyan daha əvvəl layihə çərçivəsində təməl işlərinə 2026-cı ildə başlanmasının planlaşdırıldığını bildirmişdi.

Aytac Zeynalova