İlham Əliyev BƏƏ Prezidentinə zəng edib

Azərbaycan Prezidenti İlham Əliyev avqustun 10-da Birləşmiş Ərəb Əmirliklərinin Prezidenti Şeyx Məhəmməd bin Zayed Al Nəhyana zəng edib.

Danışıqlar zamanı iki ölkə arasında dostluq və əməkdaşlıq əlaqələrinin inkişafından məmnunluq ifadə olunub. Tərəflər İlham Əliyevin BƏƏ-yə son səfərini və Əbu-Dabidə baş tutan görüşü müsbət qiymətləndiriblər.

Prezident Əliyev ABŞ Prezidenti Donald Trampın vasitəçiliyi ilə Azərbaycan və Ermənistan arasında imzalanmış sənədlərin regional sülh və sabitlik baxımından əhəmiyyətini vurğulayıb. O, iyul ayında Əbu-Dabidə keçirilmiş ikitərəfli görüşün bu prosesə töhfə verdiyini qeyd edərək, BƏƏ Prezidentinə təşəkkür edib.

Şeyx Məhəmməd bin Zayed əldə olunmuş razılaşmaları təqdir edərək, onları tarixi adlandırıb və Azərbaycan Prezidentini təbrik edib.

Enerji, xüsusilə bərpaolunan enerji sahəsində əməkdaşlıq məsələləri və qarşılıqlı investisiya imkanları da müzakirə olunub.

Prezident Əliyev BƏƏ liderini Azərbaycana rəsmi səfərə dəvət edib. Dəvət razılıqla qəbul olunub.