Zahid Oruc: Azərbaycanda sosial media platformalarının ofisləri açılmalıdır/Video

Deputat Zahid Oruc sosial media platformalarında yayılan dezinformasiya ilə bağlı hökumətin mövqeyinin gücləndirilməsinin vacibliyini vurğulayıb. Bu barədə deputat dekabrın 2-də Milli Məclisin iclasında çıxışı zamanı deyib. 

Orucun sözlərinə görə, “Made in Azerbaijan”, “Azad Söz” və digər onlayn kanallar da daxil olmaqla, müxtəlif qurum və şəxslər xarici platformalarda ölkə haqqında əsassız məlumatlar yayır.

Deputat bildirib ki, o, Avropa ölkələrinin bu sahədə təcrübəsini araşdırıb və həmin ölkələrdə sosial media şirkətlərinin hökumət qurumları ilə birbaşa əməkdaşlıq apardığını qeyd edib.

“Onları hökumət binalarına dəvət edir, ofislərinin fəaliyyət göstərməsini təmin edirlər. Biz də bu yanaşmanı tətbiq edə bilərdik,” – Oruc deyib.

O əlavə edib ki, sosial media şirkətlərinin Azərbaycanda rəsmi nümayəndəliklərinin açılması hökumət üçün prioritet məsələlərdən biri olmalıdır.

Deputat bildirib ki, sosial media platformaları müəyyən şəxslər tərəfindən yönləndirilir və yanlış məlumatların qarşısının alınması üçün institusional yanaşma tələb olunur.

Gülnar Nazimqızı