Nazir: İranda yaşayan Azərbaycan vətəndaşları ilə bağlı ciddi problem yoxdur

Xarici işlər naziri Ceyhun Bayramov hazırda İranda yaşayan Azərbaycan vətəndaşları ilə bağlı ciddi problemin müşahidə olunmadığını açıqlayıb. Nazir bunu 20 Yanvar – Ümumxalq Hüzn Günü ilə əlaqədar Şəhidlər xiyabanını ziyarət edərkən jurnalistlərə açıqlamasında deyib.

Bayramovun sözlərinə görə, İranda olan Azərbaycan vətəndaşları ilə bağlı həm Tehrandakı səfirlik, həm də Təbrizdəki baş konsulluq fasiləsiz fəaliyyət göstərir.

“Səfərdə olan və orada yaşayan vətəndaşlarımızla bağlı diplomatik nümayəndəliklərimizin fəaliyyəti bu müddət ərzində bir saat belə dayanmayıb. Hər hansı çətinlik yaranarsa, vətəndaşlarımız müraciət edə bilərlər. Hazırda hər hansı problem görmürük”, –  nazir vurğulayıb.

Rəsmi Bakı bölgədəki prosesləri izlədiyini və vətəndaşların təhlükəsizliyini nəzarətdə saxladığını bildirir.

Aytac Zeynalova