Hindistan və Pakistan AQEM sammitində Kəşmir məsələsi üzrə mübahisə ediblər

Bakıda keçirilən AQEM-in VII Zirvə Görüşündə Hindistanın nümayəndəsi  və Pakistanın Azərbaycandakı səfiri Kəşmirin statusu ilə bağlı bir-birinə zidd fikirlər bildiriblər.

Hindistanlı nümayəndə Kəşmirin Hindistan ərazisi olduğunu və bu statusun dəyişməyəcəyini deyib. O, Pakistanı Hindistanın daxili işlərinə qarışmaqda və Kəşmiri işğal etməkdə ittiham edərək, Pakistanı bu ərazini azad etməyə çağırıb.

Pakistanın Azərbaycandakı səfiri isə Kəşmirin Hindistana məxsus olmadığını, beynəlxalq səviyyədə tanınan mübahisəli ərazi olduğunu bildirib.

Onun sözlərinə görə, münaqişə yalnız kəşmirlilərin iradəsi əsasında və BMT-nin nəzarəti altında həll oluna bilər.

Səfir BMT qətnamələrinin qüvvədə olduğunu və hüquqi baxımdan məcburi xarakter daşıdığını deyib, Cammu və Kəşmirdə təzyiq və işğala son qoyulmasına çağırıb.

Gülnar Nazimqızı