Türkiyəli jurnalist Azərbaycanda hakimiyyəti ələ keçirməyə çağırışda ittiham olunur

Türkiyə vətəndaşı, “Şanlıurfa Olay” qəzetinin köşə yazarı Celal Çiftçi Azərbaycanda hakimiyyətin zorla ələ keçirilməsinə, konstitusiya quruluşunun zorla dəyişdirilməsinə və dini nifrət və düşmənçiliyin salınmasına yönələn materialları yaymaqda ittiham olunur. Onun barəsində beynəlxalq axtarış elan edilib.Bu barədə Azərbaycan Baş Prokurorluğu məlumat yayıb.

Məlumata görə, sosial şəbəkələrdə Çiftçi və digər şəxslər tərəfindən yayılan materiallarla bağlı daxil olmuş məlumatlar əsasında araşdırma aparılıb. Araşdırma zamanı dini radikalizm məzmunlu, o cümlədən süni intellekt vasitəsilə hazırlanmış materialların təkrar yayıldığı və radikal məzmunlu çağırışların edildiyi müəyyən olunub.

Baş prokurorun qərarı ilə oktyabrın 16-da Azərbaycan Cinayət Məcəlləsinin 281.2, 283.2.1 və 167-3.1-ci maddələri üzrə cinayət işi başlanıb. İbtidai istintaqın aparılması Baş Prokurorluğun İstintaq idarəsinə tapşırılıb.

Həmin maddələr hakimiyyətin zorla ələ keçirilməsinə və konstitusiya quruluşunun zorla dəyişdirilməsinə yönələn təkrar açıq çağırışları, zor tətbiq etməklə dini nifrət və düşmənçiliyin salınmasını, eləcə də dini ekstremist fəaliyyətə çağıran materialların hazırlanmasını, saxlanmasını və yayılmasını əhatə edir.

Baş Prokurorluq bildirib ki, Çiftçi cinayət işi üzrə təqsirləndirilən şəxs qismində cəlb olunub. Onun və digər şəxslərin barəsində istintaq hərəkətlərinin aparılması məqsədilə Türkiyənin səlahiyyətli orqanlarına beynəlxalq hüquqi yardım haqqında sorğular göndərilir.

Hazırda materialların məzmununun, onların hazırlanması və yayılması hallarının, eləcə də iş üçün əhəmiyyətli digər faktların araşdırılması davam etdirilir.

Baş Prokurorluq vətəndaşları dini zəmində nifrət və düşmənçiliyi təşviq edən məzmunun yayılmasından çəkinməyə və sosial şəbəkələrdən məsuliyyətlə istifadə etməyə çağırıb.