Tokayev Əliyevi Zəfər Günü münasibətilə təbrik edib

Qazaxıstan Prezidenti Kasım-Jomart Tokayev Azərbaycan Prezidenti İlham Əliyevi 8 Noyabr – Zəfər Günü münasibətilə təbrik edib. “Tokayev təbrik məktubunda bu tarixin Azərbaycanın dövlətçilik tarixində xüsusi yer tutduğunu bildirib.

Tokayev Azərbaycanı ərazi bütövlüyünü bərpa etməsi və suverenliyini möhkəmləndirməsi münasibətilə təbrik edib. O, Azərbaycanın Cənubi Qafqazda uzunmüddətli sülh və sabitliyin möhkəmləndirilməsinə yönəlmiş siyasətinin region ölkələrinin iqtisadi inkişafı üçün yeni imkanlar aça biləcəyini qeyd edib.

Tokayev Qazaxıstan və Azərbaycan arasında strateji tərəfdaşlıq və müttəfiqlik əlaqələrinin yüksək səviyyədə olduğunu vurğulayaraq, ikitərəfli münasibətlərin və xalqlar arasında dostluğun bundan sonra da möhkəmlənəcəyinə əminliyini ifadə edib.