Ramiz Mehdiyev 14 illik şərti cəzadan apellyasiya şikayəti verib

Dövlətə xəyanət, hakimiyyəti zorla ələ keçirməyə cəhd və korrupsiya ilə bağlı cinayətlərdə təqsirli bilinərək 14 il şərti azadlıqdan məhrum edilən Ramiz Mehdiyev Bakı Ağır Cinayətlər Məhkəməsinin hökmündən apellyasiya şikayəti verib. Bu barədə Qafqazinfo məlumat yayıb.
Şikayət ərizəsində cinayət işinə yenidən baxılması, əməllərinə hüquqi qiymət verilməklə daha yüngül qərar çıxarılması xahiş olunub.
İşə Bakı Apellyasiya Məhkəməsində baxılacaq. Prosesin tarixi hələ məlum deyil.
Uzun illər Prezident Administrasiyasının rəhbəri vəzifəsində çalışmış Ramiz Mehdiyevin barəsində cinayət işi ötən il başlanıb. Dövlət Təhlükəsizliyi Xidməti onun dövlət çevrilişinə cəhdlə bağlı fəaliyyəti barədə səs yazıları yayıb.
Ötən ay çıxarılan hökmlə Mehdiyev hakimiyyəti zorla ələ keçirməyə yönələn hərəkətlərdə, dövlətə xəyanətdə, cinayət yolu ilə əldə edilmiş pulların leqallaşdırılmasında və külli miqdarda rüşvət almaqda təqsirli bilinib.
Məhkəmə onun yaşını və səhhətini nəzərə alaraq 14 il şərti cəza təyin edib. Həmçinin dövlət təltiflərindən məhrum edilməsi üçün təqdimat göndərilməsi və üzərinə həbs qoyulmuş əmlakının müsadirə olunması barədə qərar qəbul edilib.
























