Putin: Rusiya həqiqi bir dostunu itirdi

Rusiya prezidenti Vladimir Putin "Total" şirkətinin prezidenti Kristof de Margerin təyyarə qəzası nəticəsində həyatını itirməsinə münasibət bildirib. 

ANN.Az-ın Rusiya mətbuatına istinadən verdiyi xəbərə görə, Putin Vnukova-3 aeroportundakı qəza zamanı Margerin həlak olduğunu eşidəndə şoka düşdüyünü deyib. Dövlət başçısı onun timsalında Rusiyanın həqiqi bir dostu itirdiyini bildirib. 

Putinin Fransa prezidenti Fransua Ollanda göndərdiyi başsağlığı məktubunda deyilir: ""Total" prezidenti Kristof de Margerin və heyətinin ölümü ilə nəticələnən qəza xəbərini eşidəndə şok oldum. Sizdən de Margerin ailəsinə və dostlarına başsağlığımı çatdırmağınızı xahiş edirəm".

De Margerlə birlikdə bir çox ortaq layihələri həyata keçirdiklərini, onun Rusiya ilə Fransa arasında uzun müddət enerji sahəsində uğurlu əməkdaşlığın memarı olduğunu bildirən Putin fikirlərini belə bitirib: "Biz ölkəmizin böyük bir dostunu itirdik. Onun xatirəsini hər zaman yaddaşımızda saxlayacağıq".

ANN.Az