Araz Quliyevin ailə üzvləri bu qərarın əsassız olduğunu bildirərək, prezident İlham Əliyevə, Ədliyyə Nazirliyinə, Ədliyyə Nazirliyi yanında İctimai Komitəyə və Beynəlxalq Qızıl Xaç Komitəsinin Azərbaycandakı nümayəndəliyinə müraciət etmişdilər. 

Musavat.com-un cenubnews.com-a istinadən verdiyi xəbərə görə, "Qırmızı Xaç”ın Azərbaycandakı nümayəndəliyi ötən gün Araz Quliyevin ailə üzvlərinə zəng edərək artıq məhbusla görüşdüklərini deyiblər. Onu da qeyd ediblər ki, Araz Quliyevin saxlanılan yeri ilə tanış olublar və "səhhətində heç bir problem yoxdur”.

Xatırladaq ki, 2014-cü il dekabr ayının 22 də məhkum Elşad Babayev sözügedən həbsxanada, karserdə öldürüldükdən sonra məhkumlar etiraz aksiyası keçiriblər. Aksiyada türmənin bir neçə əməkdaşını döyülməkdən xilas edən, həmçinin, müəssisəyə ziyan vurmağa çalışan məhkumların qarşısını alan, üsyanı sakitləşdirməyə çalışan hicab məhbusları - Araz Quliyev, Anar Qasımlı, Ramil Vəliyev, Rza Ağalı, İlham Hətəmov və digərləri işgəncələrə məruz qalıblar. 

Dekabrın 26-da isə həbsxanaya xüsusi təyinatlı qüvvələr yeridilib və məhkumlar amansızcasına döydürülüb. Ardınca Araz Quliyev və Anar Qasımlı daxil olmaqla 11 məhkum işgəncə verilmək üçün İxtisaslaşdırılmış Müalicə Müəssisəsinə ("Tubzon”) aparılıblar. Bir müddət orada saxlanılan dustaqlar yenidən 14 saylı müəssisəyə qaytarılıblar və təzədən karserə, Araz Quliyev və Miryusif Əsədov isə "bunker”ə salınıblar. Martın 11-dən sonra karserdəki məhkumlardan 8 nəfəri cəza kamerasından azad edilib. Lakin Araz Quliyev, Miryusif Əsədov və Natiq adlı məhkumun karser cəzası yenidən artırılıb. Martın 19-da isə onların məhkəməsi keçirilib və Qobustan qapalı tipli həbsxanaya köçürülmələri barədə qərar çıxarılıb.

2012-ci ildə saxta ittihamlarla həbs edilən Araz Quliyevə 8 illik həbs cəzası kəsilib.