Ramiz Mehdiyevin kürəkəni yenidən məhkəmə qarşısına çıxır

Prezident Administrasiyasının və AMEA-nın sabiq rəhbəri Ramiz Mehdiyevin kürəkəni İlham Əlisəftər oğlu Əliyev barəsində məhkəmə iddiası qaldırılıb.

Yeniavaz.com-un əldə etdiyi məlumata görə, İlham Əliyevə qarşı qaldırılan məhkəmə iddiası ilə bağlı avqust ayının 16-da Bakı Kommersiya Məhkəməsində hakim Emin Əliyevin sədrliyilə hazırlıq iclası keçrilib. Növbəti məhkəmə iclası sentyabr ayının 1-nə təyin olunub.

Məhkəmə iddiasının müqavilənin ləğv olunması ilə bağlı olduğu bildirilir.

Ramiz Mehdiyevin kürəkəninə qarşı iddia İbrahimov Mənsur Nəmətulla oğlu tərəfindən qaldırılıb. Məhkəmə prosesində maraqlı şəxs kimi "Dostluq-MK” MMC adlı şirkət də iştirak edir.

Məlumat üçün bildirək ki, İlham Əliyev Azərbaycan Milli Məclisinin IV və V çağırış (2010-2020-ci illər) deputatı olub. Mehdiyevin kürəkəni həm 2010, həm də 2015-ci illərdə 56 saylı Xaçmaz kənd seçki dairəsindən millət vəkili seçilib. Məhkəmədə maraqlı tərəf kimi iştirak edən "Dostluq-MK” MMC də İlham Əliyev deputat seçildikdən qısa müddət (4 ay) sonra – 18.03.2011-ci ildə Şabran rayonunun Gəndob kəndində qeydiyyata alınıb. Mətbuatda yer alan məlumatlarda qeyd olunur ki, İlham Əliyev "Dostluq-MK” MMC vasitəsilə Gəndob kəndi ərazisində kənd təsərrüfatı fəaliyyətilə məşğul olub. Kənd sakinlərilə İlham Əliyev arasında dəfələrlə torpaq mübahisələri yaşanıb.