Rusiya nümayəndələrinin Azərbaycana səfəri gözlənilir

Rusiya Liberal Demokrat Partiyasının (LDPR) sədri Leonid Slutski prezident İlham Əliyevi Rusiyanın “ən etibarlı tərəfdaşlarından biri” adlandırıb və Azərbaycanla münasibətləri pozmaq cəhdlərini tənqid edib.

Slutski bu fikirləri iyulun 6-da rusiyalı aparıcı Vladimir Solovyovun teleqram yayımında səsləndirib.

“Azərbaycan bu gün Rusiyanın strateji tərəfdaşıdır və heç vaxt bizi məyus etmir. Prezident İlham Əliyev Belarus lideri Aleksandr Lukaşenko ilə yanaşı, ən etibarlı dövlət başçılarındandır”, –  o bildirib.

Deputat həmçinin qeyd edib ki, Azərbaycan postsovet məkanında Rusiya üçün əsas tərəfdaş olaraq qalır.

Bu arada, Rusiya xüsusi xidmətlərinə yaxın “VÇK-OGPU” teleqram kanalı yazır ki, prezident Vladimir Putin Bakı ilə münasibətlərdə gərginliyi yumşaltmaq üçün diplomatik səylərə başlayıb.

Məlumata görə, gələn həftə qeyri-rəsmi nümayəndə heyətinin Azərbaycana səfəri planlaşdırılır.

N.Təbrizli