Musiqili Teatr fevral ayında maraqlı repertuarla çıxış edəcək

 

ANN.Az xəbər verir ki, qurumun Mətbuat xidmətinin rəhbəri Samir Sədaqətoğlu bildirib ki, ilin ən qısa ayı olan fevralda Musiqli Teatrda təqribən 20 tamaşa nümayiş olunacaq. Bu ay da tamaşaçılara hər zaman maraqla izlədiyi bir sıra tamaşalar - "O olmasın, bu olsun” (Ü. Hacıbəyli), "Ər və arvad” (Ü. Hacıbəyli), "Toya bir gün qalmış” (Ə. Səmədli), "Mən dəyərəm min cavana” (F. Sücəddinov, T. Vəliyeva), "www-ferzeli-kef.com” (E. Sabitoğlu, C. Məmmədov), "Kimdir müqəssir?” (Ə. Haqverdiyev), "Talelər qovuşanda” (R. Hacıyev, E. Ocaqov, F. Zöhrabov), "Qısqanc ürəklər” (R. Mirişli, M. Haqverdiyev) və başqa səhnə əsərləri təqdim ediləcək. Habelə rus dilli və balaca tamaşaçılar "Qafqazlı qardaşqızı” (R. Hacıyev), "Skapenin kələkləri” (J.B. Molyer), "Düyməcik” (H.K. Anderson), "Yağış göbələyinin macərası” (R. Şəfəq, V. Zimin), "Dəcəl çəpişlər” (O. Zülfüqarov, R. Heydər), "Bir dayan, canavar” (R. Ağayeva, A. Xayt, A. Kurlyanski), "Qırmızıpapaq” (E. Sabitoğlu, Y. Şvarts) və başqa tamaşaları izləyə biləcəklər. Qeyd edək ki, hal-hazırda Azərbaycan Dövlət Musiqili Teatrında bir neçə yeni tamaşa hazırlanır.

 

Fevral ayında həmin tamaşalardan birinin – Xalq yazıçısı Elçinin hekayələri əsasında səhnələşdirilmiş "Baladadaşın toy hamamı” lirik komediyasının (bəstəkar Firudin Allahverdi) premyerasının keçirilməsi nəzərdə tutulur. Hazırda tamaşanın son məşqləri gedir. Premyerayla bağlı əlavə məlumat veriləcəkdir.

 

Tamaşaçılar fevral ayı ərzində Xalq artistləri Afaq Bəşirqızı, İlham Namiq Kamal, Fatma Mahmudova, Ramiz Məmmədov, Əməkdar artistlər Novruz Qartal, Nahidə Orucova, Cingiz Əhmədov, Nərgiz Kərimova, Ələkbər Əliyev, Səidə Şərifəliyeva, Əkbər Əlizadə, Svetlana Bulax, Əzizağa Əzizov, Emma Məlikova, Boris Qrafkin, Səmayə Musayeva, eləcə də gənc və istedadlı aktyorlar Ülviyyə Əliyeva, Emil Heydərov, Mehriban Zalıyeva, Əliməmməd Novruzov, Gültac Əlili, Ruslan Mürsəlov, Gülnarə Əzimova, Əlif Cahangirov, Elnarə Nağdəliyeva və başqalarının ifalarını izləyə biləcəklər. Azərbaycan Dövlət Musiqili Teatrı vaxtını səmərəli və xoş ovqatla keçirmək istəyən hər kəsi fevral ayında təqdim edəcəyi bir-birindən maraqlı tamaşalara baxmağa dəvət edir. 5 manatdan başlayan biletləri şəhərin bütün teatr-konsert kassalarından əldə etmək olar.