Paris terrorçusu tutuldu

 

 

 

Ötən ilin sonunda Fransanın paytaxtı Parisi qana bulayan terror hadisənin əsas şübhəlisi yaxalanıb. ANS PRESS-in məlumatına görə, terror aktının təşkilatçısı olduğu deyilən Salah Abdeslam Brüsseldə keçirilən əməliyyat zamanı yaralı olaraq ələ keçirilib. Onun ələ keçirildiyi ərazi bir neçə gün öncə Avropa İttifaqının sammitinin keçirildiyi məkandan bir neçə km aralıdır. 

Abdeslamdan başqa əməliyyat zamanı daha 4 nəfər yaxalanıb. 26 yaşlı Salah Abdeslamla saxlanılanların da Paris terroru ilə əlaqəsi olduğu ehtimal edilir. 

ANS PRESS-in "Euronews"a istinadla verdiyi məlumata görə, onun Fransaya ekstradisiyası gözlənilir. Fransa prezidenti Fransua Olland ən qısa zamanda Belçikaya onun verilməsi barədə sorğu göndəriləcəyini deyib. "Əminəm ki, Belçika bu məsələyə tez reaksiya verəcək". 

Belçikanın paytaxtı Brüsseldə terrorçuların axtarışı zamanı aparılan əməliyyatda dörd polis yaralanıb. Əməliyyat ötən gün olsa da əsas terrorçunun adı bu gün bəlli olub. 

Fransada terror hadisəsi ötən ilin noyabr ayının 13-də baş verib. Bir-birinin ardınca törədilən terror aktlarından ən böyüyü "Bataclan” konsert salonunda və Fransa-Almaniya arasında futbol matçı keçirilən stadionun yaxınlığında baş verib. Terror aktları nəticəsində 132 nəfər ölüb, 300-ə yaxın insan yaralanıb.