Ölkəmizin olimpiya lisenziyalarından məhrum edilməsi məsələsi müzakirə edilir

Federasiyanın mətbuat xidmətindən ANN.Az-a daxil olan məlumata görə, bununla əlaqədar olaraq Federasiya beynəlxalq hüquq şirkətlərinə müraciət etmək niyyətindədir.

Azərbaycanda idmana böyük diqqət göstərilir və bunun da əsası Ümummilli lider Heydər Əliyev tərəfindən qoyulmuşdur. Prezident İlham Əliyev Milli Olimpiya Komitəsinin rəhbəri seçildikdən sonra Azərbaycanda olimpiya hərəkatı geniş vüsət alıb.

Bu gün Azərbaycanda idmanın bir çox növü inkişaf edir və sevindirici haldır ki, ağır atletika bu sırada xüsusi yer tutur. Ağır atletika tarixən ölkəmizdə geniş yayılmış idman növlərindən biri olmuşdur. Azərbaycan Ağır Atletika Federasiyası geniş maddi-texniki bazası olan qabaqcıl idman infrastrukturu yaradıb. Ağır Atletika Akademiyası uğurla fəaliyyət göstərir.

Bütün bunlar ona gətirib çıxarmışdır ki, Azərbaycan ağırlıqqaldıranları son illərdə beynəlxalq arenada özlərini yaxşı tanıdıb.

Müsbət nəticəli dopinq testlər ilə bağlı dünyada baş verən son hadisələr Azərbaycan atletlərindən də yan keçməyib. Buna görə də Beynəlxalq Ağır Atletika Federasiyasının idmançıların diskvalifikasiyası haqqında qərarı suallar doğurur ki, Azərbaycan Ağır Atletika Federasiyası da bu suallara cavab almağa ümid edir.

Azərbaycan Antidopinq Konvensiyasına qoşulan ilk 40 ölkə arasındadır. Bununla yanaşı, Konvensiyaya qoşulduqdan sonra Azərbaycan Milli Məclis tərəfindən xüsusi olaraq yaradılmış Komitə vasitəsi ilə antidopinq üzrə qanun işləyən ilk ölkələrdən biridir. Bütün bunlar Azərbaycan Ağır Atletika Federasiyasının beynəlxalq instansiyalarda iddiasının öz müsbət həllini tapacağına əsas verir.