Qiymətli kağızlar sahəsində biznes simulyasiya yarışı

Biznes simulyasiya "praktiki təhsil” konsepsiyasının modellərindən biridir. Simulyasiya oyununda qiymətli kağızlar bazarında müxtəlif situasiyalar modelləşdirilir, iştirakçılara idarəetmənin bütün aspektləri – müddət, qiymət, risk, qərarların qəbul etmək bacarığı və digər faktorlar öyrədilir.   

Yarışın keçirilməsində məqsəd - qiymətli kağızların (səhmlərin) alqı-satqı prosesinin və brokerlərin vasitəçilik funksiyalarının gənclərə öyrətmək, biznes sahəsində tələbələrin kommunikativ bacarıqlarının inkişaf etdirmək olmuşdur. 

Tədbirdə Azərbaycan Respublikası Prezidenti Administrasiyasının İctimai-siyasi məsələlər şöbəsinin Gənclər təşkilatları ilə iş sektorunun,Gənclər və İdman Nazirliyinin, İqtisadiyyat Nazirliyinin, Azərbaycan Respublikasının Prezidenti yanında Gənclər Fondunun,Azərbaycan Dövlət İqtisad Universitetinin (UNEC), Bakı Fond Birjasının, kommersiya şirkətlərinin və ictimai təşkilatların nümayəndələri iştirak etmişdir.

Simulyasiya yarışı iki gün davam edib. Hər biri dörd tələbədən ibarət 11 komanda qiymətli kağızlar bazarının iştirakçıları qismində çıxış edib. Yarışın birinci günü gənclər üçün idarəetmə bacarıqlarının inkişaf etdirilməsi üzrə master-klass keçirilib, birja simulyasiya ilə tanışlıq olub. Bazarda mövcud olan müəyyən situasiyaların modelləşdirilməsi mövzusunda tapşırıqlar verilib və yarış test rejimində keçirilib. İkinci gün isə komandalar virtual bazarda rəqabət aparmağı və düzgün qərarların verilməsi bacarıqlarını nümayiş etdiriblər. Komanda virtual bazarın dəyişən şərtlərinə, hadisələrinə və qiymətlərinə çevik reaksiya verərək, idarə etdiyi kapitalın artmasını təmin edib.

Sonda maliyyə bazarı mütəxəssislərindən ibarət müstəqil münsiflər heyəti qalibləri müəyyən edib. Vaxt və korporativ resurslardan optimal istifadə etməklə ən yaxşı nəticə göstərən UNEC-in Beynəlxalq İqtisadiyyat Məktəbinin tələbələrindən ibarət komanda birinci yerin qalibi olub. Maliyyə və Mühasibat, Beynəlxalq İqtisadiyyat Məktəbi və Magistratura Mərkəzinin tələbə və magistrlarından ibarət komanda ikinci, SABAH qruplarının komandası isə üçüncü yerə layiq görülüb. Biznes simulyasiya yarışının xüsusi nominasıyası olan "Bütün maliyyə alətlərindən istifadə edən” komanda isə Biznes və menectment fakültəsinin tələbələri olub. Qalib komandalar hədiyyə və diplomlarlar təltif olunub. 

Birinci yerin qalibləri – UNEC-in Beynəlxalq İqtisadiyyat Məktəbinin tələbələri Emil Alıyev, Arzu Əmirova, Səbinə Nəzəfzadə və Nəzrin Heydərova "ZZ Group” şirkətinin təcrübə proqramında müsabiqədən kənar iştirak etmək hüququnu qazanıblar. Qeyd edək ki, bu şirkətdə təcrübə keçmək üçün tələbələr iki mərhələli imtahandan keçirlər.