Azərbaycanda həyat sığortası üzrə ödənişlərin payı 77%-ə yüksəlib

Bu ilin yanvar–noyabr aylarında Azərbaycanda həyat sığortası növləri üzrə toplanmış sığorta haqları 773,9 milyon manat təşkil edib ki, bu da ötən ilin eyni dövrü ilə müqayisədə 16,1% çoxdur.
“Report”un Azərbaycan Mərkəzi Bankına istinadən verdiyi məlumata görə, hesabat dövründə həyat sığortası üzrə ödənişlər 32,2% artaraq 595,7 milyon manata çatıb.

Beləliklə, 11 ay ərzində həyat sığortası bazarında toplanan hər 100 manat sığorta haqqının 77 manatı müştərilərə ödənilib. Bu göstərici ötən ilin eyni dövründə 67,6 manat olub.
Ümumilikdə isə yanvar–noyabr aylarında Azərbaycanda fəaliyyət göstərən 16 sığorta şirkəti vasitəsilə 1 milyard 365,4 milyon manat sığorta haqqı toplanıb. Bu, illik müqayisədə 11,7% artım deməkdir.

Eyni dövrdə sığorta şirkətlərinin həyata keçirdiyi ödənişlərin həcmi 844,8 milyon manat olub ki, bu da bir il əvvələ nisbətən 21,7% çoxdur.
Nəticədə, sığorta bazarında toplanmış hər 100 manat sığorta haqqının 61,9 manatı ödəniş edilib. Bu göstərici ötən ilin eyni dövründə 56,8 manat təşkil edib