Səfir: “Ukrayna ilə kompleks əməkdaşlığın həyata keçirilməsində maraqlıyıq”

 

Azərbaycanın Ukraynada yeni təyin edilmiş səfiri Azər Xudiyev redaksiyaya gəlişi zamanı iki dövlət arasında informasiya əməkdaşlığının genişləndirilməsinin vacibliyini və bu işdə Caspian Energy kimi beynəlxalq kütləvi informasiya vasitələrinin xüsusi rol oynadığını qeyd edibr. Diplomat 4-cü Beynəlxalq Caspian Energy Forum-un Bakıda keçirilməsinin və tədbirdə Ukrayna şirkətlərinin iştirakının aktuallığını vurğulayıb.

Dövlətlərimiz arasındakı ikitrəfli əlaqələrdən bəhs edərkən A.Xudiyev Azərbaycan Prezidenti İlham Əliyevlə Ukrayna Prezidenti Petro Poroşenko arasında bu yaxınlarda Bakıda baş tutmuş danışıqların enerji, ticarət, kənd təsərrüfatı, hərbi-texniki əməkdaşlıq sahələrində Azərbaycan-Ukrayna əlaqələrinin inkişafına yeni təkan verdiyini, müxtəlif sahələrdə bir sıra nüfuzlu layihələrə gücləndirilmiş hazırlığın başlandığını qeyd edib.

"Hal-hazırda Azərbaycan və Ukrayna hökumətlərarası komissiyalarının iqtisadi-ticari əməkdaşlıq üzrə qəbul etdiyi qərarların icrası ilə bağlı gərgin iş gedir. Kənd təsərrüfatı sahəsində qarşılıqlı əlaqələr möhkəmlənir, meyvə-tərəvəz məhsullarının tədarük həcminin artırılması, həmçinin onların hər iki dövlətin ərazisində emalı məqsədilə müvafiq ortaq müəssisələrin yaradılması məsələlərinə baxılır. Biz Azərbaycan məhsulunun Ukraynaya ixracatını artırmaqda maraqlıyıq”, - deyə səfir çıxışına davam edib. A.Xudiyevin Bakıda Azərbaycan tərəfindən Ukraynaya enerji resursları tədarükü imkanlarının  müzakirə edildiyini və bu baxımdan karbohidrogenin Odessa-Broda kəməri vasitsəilə nəqlinin nəzərdən keçirildiyini bildirib. "Sözsüz ki, neftin Odessa-Broda boru kəməri vasitəsilə nəqli layihəsinin yenilənməsi hər iki dövlət üçün sərfəlidir və mənim fikrimcə, bu, kompleks əməkdaşlığın ən yaxşı tərəflərindən biri olacaq”, - deyə diplomat qeyd edib.

Görüşün sonunda Azər Xudiyev Caspian Energy jurnalına eksklüziv müsahibə verib. Müsahibə zamanı o, bir sıra konkret istiqamətlərə və layihələrə toxunmuş, enerji bazarının, həmçinin turizm sektorunun inkişaf perspektivləri barədə danışıb.