"Sarkisyanın bu hücumu təşkil edəcəyi gözlənilən idi" - EKSPERT

ANN.Az xəbər verir ki, bunu hərbi ekspert Üzeyir Cəfərli dekabrın 29-da səhər saatlarında Ermənistanın Azərbaycanla sərhəddə törətdiyi təxribat xarakterli hücumunu şərh edərəkən deyib.

 

"Çünki, təşkil edilən növbəti təxribat xarakterli hücum işğal olunan ərazilərdə deyil, məhz Ermənistan-Azərbaycan sərhədində baş verib. Ermənistan çox çalışır ki, bu cür hücumların sayını artırsın. Həm də ATƏT-in Minsk qrupunun çox arzuladığı bir mənzərə yaranıb. Onlar iki prezidenti bir araya gətirə bilmədilər. 2016-cı ildə onların qarşıya qoyduğu ən böyük məsələlərdən biri o idi ki, Azərbaycan və Ermənistan prezidentlərini görüşdürsünlər və formal danışıqlar aparılsın. Amma Almaniyada hər iki ölkənin xarici işlər naziri bir aya gəldi. Düşünürdülər ki, prezidentləri ATƏT-in hesabatı üçün görüşdürəcəklər. Bu isə alınmadı. Bununla yanaşı, Ermənistan Sankt-Peterburqda üç gün bundan əvvəl çox böyük "tərs sillə” aldı. KTMT-nin yeni baş katibi seçilmədiyinə görə, Ermənistan bu görüşdən çox qəzəbli ayrıldı. Serj Sarkisyan o görüşdən gələn kimi dərhal, öz "əl altılarına” göstəriş verdi ki, təxribat, məhz, iki ölkənin sərhədində baş versin. Əslində, bu, gözlənilən idi. Çünki Ermənistan Rusiya, Belarusiya, Qazaxıstandan çox böyük narazılıq edir ki, KTMT üzvləri onları müdafiə etmir. Ermənilər Rusiya, Belarusiya, Qazaxıstanı bir müsəlman ittifaqı kimi qələmə verir. Bütün bunları nəzərə alaraq, düşünmürəm ki, bu döyüş daha da geniş vüsət alsın. Yaxın saatlar ərzində sakitləşəcəklər. Çünki, ermənilərin özlərinin də itkiləri var. Təəssüflər olsun ki, Azərbaycan tərəfdən də itki var. Hazırda Azərbaycan Müdafiə Nazirliyi vəziyyətə tam nəzarət edir”.

"Azərbaycan Ermənistanın təşkil etdiyi təxribata getməyəcək. Çünki ermənilərin təxribat törətdiyi istiqamətdə bizim hər hansı bir məqsədimiz, məramımız yoxdur. Bilavəsitə, Ermənistan əraziləri ilə əlaqədardır. Bizim əgər hücumla bağlı belə bir fikrimiz olsaydı, o qədər döyüş aparacaq ərazilərimiz var. Misal üçün, Talış  istiqamətində hücum aparmağın mənası var. Buna görə, düşünmürəm ki, Azərbaycan hər iki dövlətin sərhədi istiqamətdə hər hansı bir addım atsın”, - deyə Ü.Cəfərli əlavə edib.

Azərbaycan Müdafiə Nazirliyinin rəsmi məlumatına görə, dekabrın 29-da səhər saatlarında Ermənistan Silahlı Qüvvələrinin kəşfiyyat qrupu Azərbaycan-Ermənistan dövlət sərhədini pozmağa cəhd göstərərkən bölmələrimizin pusqusuna düşüb.

"Döyüş toqquşması zamanı düşmən tərəfi canlı qüvvə sarıdan xeyli itki verərək geri çəkilməyə məcbur edilib. Hadisə nəticəsində Silahlı Qüvvələrimizin hərbi qulluqçusu əsgər Qurbanov Çingiz Salman oğlu itkin düşüb. Onun tapılması istiqamətində müvafiq tədbirlər görülür. Son zamanlar cəbhə xəttində nisbi sakitliyin hökm sürməsi, görünür, Ermənistanı qane etmir və qarşı tərəf məqsədyönlü şəkildə, vaxtaşırı bu kimi təxribatlara əl atır. Müdafiə Nazirliyi bildirir ki, əgər, bundan sonra da düşmənin bu cür fəaliyyəti davam edərsə o, daha böyük və ağır itkilərlə üzləşəcəkdir", - deyə məlumatda bildirilir.