Trampın mətbuat konfransı maliyyə bazarlarına ciddi təsir edəcək

"Report" xəbər verir ki, maliyyə bazarları üçün bu gün keçiriləcək mətbuat konfransı yanvarın 20-də gözlənilən prezidentin inauqurasiya mərasimindən daha önəmlidir. Belə ki, bugünki çıxışında D.Trampın vergi dərəcələrinin azaldılması və fiskal xərclərin artırılması barədə vədlərini yenidən təkrar edib-etməyəcəyi və bu qərarlar barədə bəyanatları diqqətlə izlənəcək. 

Qeyd edək ki, 8 noyabr prezident seçkilərindən sonrakı iki ay ərzində ABŞ dolları və ölkənin fond birja indeksləri məhz Trampın bu vədləri ilə kəskin artım göstərib. Bugünki mətbuat konfransında yuxarıda sadalanan vədlərlə yanaşı Rusiya ilə münasibətlər, Çinlə ticarət əlaqələrinin gələcəyi, "Obamacare" adlanan səhiyyə islahatları ilə bağlı sualların cavabı maliyyə bazarları tərəfindən qiymətləndiriləcək.

"Report"un analitik qrupu bugünki mətbuat konfransından sonra dolların məzənnəsinin, fond indeksləri və xammal qiymətlərinin ciddi dəyişə biləcəyini proqnozlaşdırır.