Silahlı Qüvvələrin Baş Klinik Hospitalının 25-ci ildönümü münasibətilə tədbir keçirilib

 

APA-nın nazirliyin saytına istinadən verdiyi xəbərə görə, tədbirdə hospitalın yaranma tarixindən, keçdiyi uğurlu və şərəfli inkişaf yolundan danışan Müdafiə Nazirliyi Tibb Baş İdarəsinin rəisi, tibb xidməti general-mayoru Natiq Əliyev ölkəmizin ilk hərbi səhiyyə ocağının inkişaf etdirilməsində Heydər Əliyevin və Azərbaycan prezidenti, Ali Baş Komandan İlham Əliyevin misilsiz xidmətlərinin olduğunu deyib.

 

Tibbi heyətlə görüşən Müdafiə naziri general-polkovnik Zakir Həsənov Silahlı Qüvvələrin hər bir sahədə olduğu kimi hərbi tibb sahəsinin də sürətlə inkişaf etdiyini vurğulayıb.

Müdafiə naziri ötən ilin aprel ayında cəbhə xəttində baş vermiş döyüşləri, o cümlədən Ermənistanın daim vəziyyəti gərginləşdirmək məqsədilə təxribatlar törətməsini xatırladaraq hərbi tibb mütəxəssislərinin peşəkarlıqlarını artırmalarını, dərin biliklərə və geniş təcrübəyə malik olmalarını xüsusi qeyd edib.

Nazir Silahlı Qüvvələrin tibb heyətinə uğurlar diləyərək hərbi tibb müəssisələrinə müraciət edənlərə yüksək peşəkarlıq və qayğı ilə xidmətin göstərilməsinə dair tapşırıqlar verib.

 

Sonra səhiyyə sahəsində göstərdikləri xüsusi xidmətlərə görə müdafiə nazirinin əmri ilə şəxsi heyətin bir qrupu təltif olunub.