Ən cavan prezident

Oxu.Az xəbər verir ki, bazar günü Emmanuel Makron yeni seçilmiş dövlət başçısı kimi ilk nitqi ilə çıxış edib. 

Simvolik olaraq yeni seçilmiş Fransa prezidenti Avropa İttifaqının himni olan Bethovenin "Sevinc odası” sədaları altında Luvrun piramidasının podiumuna qalxıb. 

Makron ölkənin siyasi həyatını mənəvi normalara uyğunlaşdırmağa, demokratiyanı hücumlardan qorumağa, iqtisadiyyatı möhkəmləndirməyə, vahid Avropa üçün yeni təməl yaratmağa və bütün fransızların təhlükəsizliyini təmin etməyə söz verib. 

Makron – Fransa respublikasının tarixində ən cavan prezidentdir. Qəribəsi odur ki, indiyə qədər o, seçki yolu ilə heç bir postu tutmayıb. Makron nüfuzlu Parisin Milli Administrasiya məktəbini (ENA) bitirib. O, uğurlu biznesmendir – sərmayəçi bankir olub. Amyen şəhərindən orta səviyyəli ailədən olan (valideynləri həkimdir) Makronun siyasi təcrübəsi sabiq prezident Fransua Ollandın administrasiyasında iş və iqtisadiyyat naziri vəzifəsində ikiillik fəaliyyəti ilə məhdudlaşır. Nazir vəzifəsində Makron, həmkarlar ittifaqlarının və sol fəalların etirazlarına səbəb olan əmək qanunvericiliyində islahatın müəllifi kimi məşhur oldu. 

Tezliklə cavan siyasətçi Sosialist partiyasının sıralarını tərk edərək öz partiyasını "En Marche!” ("İrəli!”) yaratdı.

 Şərhçilər onun seçkiqabağı kampaniyası ilə Barak Obamanın 2008-ci ildə keçirdiyi kampaniyası arasında - gənclərə ümid, tərəfdaşları sosial şəbəkələr tərəfindən cəlb edilməsi, "qapıdan qapıya” təbliğatı ilə məşğul olan çoxsaylı fəallar şəbəkəsini yaradılması kimi bənzərliklərin olduğunu qeyd ediblər.