Xöşbəxt Yusifzadə: “AÇG”yə $42 mlrd sərmayə qoyulub

Anews.az-ın məlumatına görə, bunu Bakıda keçirilən Beynəlxalq Xəzər neft-qaz konfransında Azərbaycan Dövlət Neft Şirkətinin (SOCAR) I vitse-prezidenti Xoşbəxt Yusifzadə bildirib.

O deyib ki, AÇG layihəsinə 42 mlrd. dollardan çox sərmayə qoyulub.

O qeyd edib ki, SOCAR-ın "Azneft” İstehsalat Birliyi tərəfindən 2016-cı ildə 6,2 mln. ton neft, 5,6 mlrd. kubmetr qaz hasil edilib: 

"Hasil edilən neft və qaz daxili, eləcə də xarici bazarlara çıxarılıb”.

X.Yusifzadə, həmçinin Azərbaycanın nəhəng enerji layihələrinin təşəbbüskarı olduğunu vurğulayıb: 

"Hazırda həyata keçirilən "Cənub Qaz Dəhlizi” layihəsi Azərbaycanın ən böyük enerji və infrastruktur layihəsidir. Eyni zamanda, bu layihə Avropa İttifaqı tərəfindən də dəstəklənir”.

O bildirib ki, hazırda istismar edilən "Şahdəniz-1” layihəsində sabit dinamika əldə olunub: 

"Bu mərhələdə qaz hasilatı ildə 9 mlrd. kubmetr təşkil edir. İşlənmənin ikinci mərhələsində əlavə olaraq 16 mlrd. kubmetr qaz hasil ediləcək. Bunun üçün mühüm tədbirlər görülür. 26 sualtı quyu, 2 yeni platforma inşa olunur. 300 kilometr uzunluğunda sualtı boru kəmərləri çəkilir. Səngəçal terminalı genişləndirilir. Mayın ayının əvvəlinə layihə çərçivəsində işlərin 93 faizi yerinə yetirilib”.