Tutanhamonun məqbərəsindəki müəmmalı qəhvəyi ləkələrin sirri bilindi - VİDEO

Tutanhamonun məqbərəsi ilə bağlı sirr açılıb.

Bərpası üçün xeyli əziyyət çəkilən məqbərədəki "lənət"in sirri çözülüb.

3000 ilin məzarını bərpa etmək üçün 10 ildən çox vaxt sərf olunub. Əvvəllər "lənətli" olduğu düşünülən məqbərə yenidən şöhrətə qovuşub.

10 illik bərpa müddətində ekspertlərin səyi ilə divarlardakı rəsmləri və mumyalanmış cəsədi qorumaq üçün xüsusi baryerlər qoyulub və ventilyator sistemi quraşdırılıb.

Onlar 1922-ci ildə arxeoloq Hovard Karterin aşkarladığı məqbərənin divarındakı qəhvəyi rəngli ləkələri araşdırmaq üçün xeyli vaxt sərf ediblər.

"Getty Conservation Institute" və Misirin Əntiq Tarix Nazirliyinin mütəxəssisləri illər sonra məqbərədə restavrasiya işlərini tamamlayıblar. Ötən gün Fironun mumyalanmış cəsədinin saxlanıldığı məqbərə yenidən turistlər üçün açılıb.

Live Science yazır ki, məqbərənin divarında göbələk kimi böyüyüb, çoxalan qəhvəyi ləkələr ölmüş mikroblardır. Bakteriyalar Karter məzarı açdıqdan sonra yayılmayıb. Boya ilə divarın arasında qalan mikroblar zərərsizdir. Əvvəllər turistlərin ziyarəti və  tozla bağlı olaraq yarandığı düşünülən qara ləkələr hazırda divarda qalmaqdadır.

Karterin kəşfindən sonra həmin məqbərənin lənətli olduğu düşünülüb. Karterə sponsorluq edən Karnarvorun qan zəhərlənməsinə görə ölümündən sonra bu fərziyyələr daha inandırıcı hal alıb.

Qeyd edək ki, Tutanhamon qədim Misirin ən məşhur fironlarından biri olub. Eramızdan əvvəl 1332-ci ildə 9 yaşında taxta çıxmış firon 9 il sonra qəflətən vəfat edib. Onun öz əcəli ilə ölməsi və ya öldürülməsi mübahisəli məsələ olaraq qalır./milli.az