Prezident yeni seçki təyin etdi

"Media forum" saytının məlumatına görə, Pyotr Poroşenko Ali Radada hakim koalisiyanın dağılmasından bir ay ötdüyünü nəzərə alaraq bu addımı atıb. Hakim "Avropa seçimi" koalisiyası iyulun 24-də dağılıb. UDAR və Azadlıq partiyaları koalisiyadan çıxdığına görə baş nazir Arseni Yatsenyuk istefa verib, ancaq sonradan hökumətə rəhbərliyi davam etdirib. Ukrayna Konstitusiyasına görə, Ali Radada hakim koalisiya bir ay ərzində formalaşmasa, parlament buraxıla bilər.Pyotr Poroşenko qərarını əsaslandırarkən Ali Radanın ölkədə qanlı olaylarda böyük məsuliyyət daşıdığını vurğulayıb və demokratik qüvvələri 26 oktyabr seçkisinə vahid cəbhədə getməyə çağırıb."Media forum" saytı bildirir ki, buraxılmış parlament yeni seçkiyə kimi fəaliyyətini davam etdirəcək.Ukraynada 2012-ci il oktyabrın 28-də keçirilmiş parlament seçkisində Regionlar Partiyası 185, "Batkivşina" bloku 101, UDAR Partiyası 40, "Azadlıq" bloku 37, Kommunist Partiyası 32 mandat almışdı. Ötən ilin sonlarından gedən inqilabi proseslər nəticəsində ölkədə qüvvələr nisbəti xeyli dəyişib.

ANN.Az