BDYPİ-dən bölgələrə səfər edən və hərəkətdə olan sürücülərə müraciət

Baş Dövlət Yol Polisi İdarəsi (BDYPİ) ölkənin bir sıra bölgələrində müşahidə olunan qar yağışı və şaxtalı hava şəraiti ilə əlaqədar sürücülərə müraciət edib.

Müraciətdə bildirilir ki, sürüşkən yol örtüyü, görünüş məsafəsinin məhdudlaşması və qəfil hava dəyişiklikləri avtomobil yollarında hərəkəti çətinləşdirir və yol-nəqliyyat hadisələri riskini artırır.

Qurumun təhlillərinə görə, qarlı hava şəraitində baş verən qəzaların əsas səbəblərindən biri mövsümə uyğun olmayan və ya aşınmış şinlərdən istifadədir.

BDYPİ sürücülərə zərurət olmadıqca uzunməsafəli və dağlıq ərazilərə səfərlərdən çəkinməyi, nəqliyyat vasitələrinin texniki sazlığını, xüsusilə şinlərin qış mövsümünə uyğunluğunu, diş dərinliyini və təzyiqini yoxlamağı tövsiyə edir.

Bildirilir ki, qarlı və sürüşkən yollarda yalnız qış şinlərindən istifadə edilməli, sürət yol və hava şəraitinə uyğun seçilməli, təhlükəsiz məsafə qorunmalıdır. Sürücülərə həmçinin yorğun və yuxusuz halda sükan arxasına əyləşməmək çağırışı edilir.

Məlumatda qeyd olunur ki, BDYPİ əməkdaşları bölgələrdə gücləndirilmiş rejimdə xidmət aparır, təhlükəli yol sahələrində nəzarət tədbirləri həyata keçirilir və sürücülərlə maarifləndirici söhbətlər davam etdirilir.

Qurum bir daha vurğulayıb ki, qarlı havada düzgün şin seçimi yol hərəkəti təhlükəsizliyinin əsas şərtlərindən biridir.