Azad olunan ərazilərdə aşkarlanan minaların sayı açıqlandı

"2020-ci il noyabrın 10-dan indiyədək Qarabağda və Şərqi Zəngəzurda 23 min hektar ərazi təmizlənib, 55 mindən çox mina və partlamamış hərbi sursat aşkar edilərək zərərsizləşdirilib, o cümlədən 10 min tank əleyhinə mina, 19 min piyadaəleyhinə mina zərərsizləşdirilib", -  Süleymanov cümə günü Bakıda "Humanitar minatəmizləmə və davamlı inkişaf məqsədləri” mövzusunda keçirilən beynəlxalq konfransda çıxışı zamanı deyib.

Azərbaycan həmçinin Mina Təhlükəsinə Qarşı Mübarizə üzrə Qlobal Etimad Fondunun yaradılmasını təklif edib. Bunu Azərbaycan Prezidentin köməkçisi, Azərbaycan Prezidenti Administrasiyasının Xarici siyasət məsələləri şöbəsinin müdiri Hikmət Hacıyev deyib.

"Mina problemi Azərbaycan üçün ən aktual problemlərdən biridir. Bu gün Azərbaycanın işğaldan azad edilmiş torpaqları dünyanın minalarla ən çox çirklənmiş ərazilərindən biri sayılır. Bu baxımdan hesab edirik ki, ölkəmiz minalarla mübarizə ilə bağlı müntəzəm illik müzakirələr və qiymətləndirmələr üçün faydalı platformadır. Biz həmçinin gözləyirik ki, bu günkü konfransın nəticələrinə əsasən, Azərbaycan hökumətinin mina təhlükəsi ilə mübarizə səylərini dəstəkləyən qlobal etimad fondunun yaradılması ideyası dəstəklənəcək”, - Hacıyev bildirib. 

Onun sözlərinə görə, Azərbaycan hökuməti istənilən formada birgə əməkdaşlığa açıqdır. 

Ermənistanın işğalından azad edilmiş ərazilərdə Azərbaycan hökumətinin üzləşdiyi problemlərdən biri də minalanmış sahələrdir. 

Qarabağ və Şərqi Zəngəzur ərazisinin böyük hissəsi bu torpaqların işğalı zamanı erməni hərbçiləri tərəfindən minalanıb. Rəsmi Bakının apardığı bir sıra tədbirlər nəticəsində Ermənistandan  bir sıra rayonların minalanmış sahələrinin xəritələri alınıb. Lakin onların dəqiqliyi cəmi 25% təşkil edib. 

İkinci Qarabağ müharibəsinin başa çatdığı 2020-ci il noyabrın 10-dan indiyədək mina partlayışları nəticəsində işğaldan azad edilmiş ərazilərdə 200-ə yaxın Azərbaycan hərbçisi və mülki şəxs həlak olub və yaralanıb.