Avropa liderləri Ukraynanın dağıdılmış şəhərlərinə gedib

Finlandiyanın Baş naziri Sanna Marin Kiyevi və rus işğalçıları tərəfindən dağıdılmış İrpin və Buça şəhərlərini ziyarət edib.

Obozrevatel.com xəbər verir ki, İrpin və Buça şəhərində olan Sanna Marin, işğalçıların dağıtdığı şəhərlərin fəsadlarını görüb.

O, hərbçilərin və şəhər administrasiyalarının nümayəndələrinin müşayiəti ilə şəhərin dağıntılarını müşahidə edib. O, burada fotoşəkillərdən ibarət sərgiyə baxıb. Fotoşəkillərdə müharibə zamanı həlak olmuş insanların cəsədləri nümayiş edilib. Finlandiya rəsmisinin səfəri barədə, İrpin Şəhər Şurasının "Teleqram” və "Twitter” hesablarında məlumat verilib.

Bundan əlavə, Portuqaliyanın Baş naziri Antonio Kosta da İrpinə səfər edib. Rus qoşunları tərəfindən İrpin şəhərində törədilən vəhşiliyin və dağıntıların miqyası, onu dəhşətə gətirib.

Kosta, bu səfəri heç vaxt unutmayacağını vurğulayıb.

"İrpinə olan səfərimi heç vaxt unutmayacağam. Bu şəhərə edilən hücumların nəticəsi çox acınacaqlı və dağıdıcıdı idi. Mən günahsız insanların qəddarlıqla və mərhəmətsizcəsinə qətlə yetirildiyi, səbəbsiz yerə dağıdılmış və məhv edilmiş bir şəhərin şahidi oldum”. – Kosta qeyd edib.

Avropa Şurasının baş katibi Mariya Peyçinoviç-Buriç isə, mayın 9-da rus işğalçıları tərəfindən dağıdılmış İrpinə və Borodyankaya baş çəkib. O, Rusiya qoşunlarının dağıtdığı əraziləri və binaları görüb.

Rusiya hərbçiləri, yaxın vaxtlarda Ukraynın bir çox şəhərlərində yerləşən yaşayış massivlərini, məktəbləri, xəstəxanaları və digər mülki infrastruktur obyektlərini dağıdıb. Ən çox hücuma məruz qalan və dağıdılan şəhərlər isə Xarkov, Çerniqov, Jitomir, Mariupol, Qostomel, İrpin və Buça şəhərləri olub.

www.anews.az