"LUKOIL"-un qurucusu Vahid Ələkbərov Qarabağa gəlib

İşğaldan azad edilmiş Füzuli şəhərində aparılan bərpa və yenidənqurma işləri ilə bağlı təqdimat keçirilib. Tədbir çərçivəsində əsas diqqət Rusiyanın LUKOIL neft şirkətinin qurucusu Vahid Ələkbərovun Qarabağa səfərinə yönəlib.

“Report”un Füzuliyə ezam olunmuş müxbirinin məlumatına görə, təqdimat Füzuli Beynəlxalq Hava Limanında baş tutub.

Tədbirdə iqtisadiyyat naziri Mikayıl Cabbarov, elm və təhsil naziri Emin Əmrullayev, Prezidentin xüsusi nümayəndəsi Emin Hüseynov, eləcə də Vahid Ələkbərov və “LUKOIL Azərbaycan” QSC-nin baş direktoru Rasim Əmrəliyev iştirak ediblər.

Təqdimat zamanı Füzuli şəhərinin işğal dövründə dağıdılmış vəziyyəti, şəhərin baş planı, inşa edilən yaşayış kompleksləri və mərkəzi park layihəsi barədə məlumat verilib. Təqdimatı Prezidentin xüsusi nümayəndəsi Emin Hüseynov aparıb.

Vahid Ələkbərov Rusiyanın ən tanınmış iş adamlarından biridir. O, “Lukoil” neft şirkətinin qurucusu və uzun illər prezidenti olub. SSRİ dövründə neft sənayesində işləyib, sonradan böyük biznes qurub. Uzun müddət Rusiyanın ən varlı şəxslərindən biri sayılıb.
Ələkbərov Azərbaycan əsillidir. 

Aytac