Ukrayna beynəlxalq ictimaiyyətə müraciət edib

"Kreml başlatdığı müharibəni dayandıranadək və cinayətlərinə görə lazımi cəzanı, o cümlədən dəymiş ziyanın ödənilməsi və hərbi cinayətkarlar üçün məhkəmə hökmləri ilə cəzalandırılmayanadək təzyiqlər artırılmalıdır. Əminik ki, Ukraynanın qələbəsi dünyada təhlükəsizlik sisteminin yenilənməsi və həm Rusiyanın, həm də beynəlxalq təcavüzün qarşısının alınması istiqamətində təkan olacaq”, -  bildirilir.

 

Britaniya kəşfiyyatı bu gün bəyan edib ki, 100 gün ərzində Rusiya qoşunları Ukraynada heç bir strateji hədəfə çatmayıb .Ruslar Kiyevi və Ukraynadakı güc mərkəzlərini ələ keçirmək kimi ilkin məqsədlərinə nail ola bilməyiblər. Ukraynalıların davamlı müqaviməti və rusların ilk 24 saat ərzində Qostomel aerodromunun təhlükəsizliyini təmin edə bilməməsi sayəsində Rusiyanın hücum əməliyyatı dəf edilib. 

Rusiyanın fevralın 24-də hərbi müdaxiləsi başlayandan mayın 16-dək Ukraynada 3 752 dinc sakin ölüb, 4 062 nəfər yaralanıb. Məlumatı BMT-nin İnsan Hüquqları üzrə Ali Komissarlığı İdarəsi yayıb. Bildirilib ki, 1 406 kişi, 927 qadın, 86 qız, 96 oğlan, 68 uşaq, 1 169-u yaşlı olmaqla 3 752 dinc sakin öldürülüb, 675 kişi, 472 qadın, 96 qız, 104 oğlan, eləcə də 88 uşaq, 2 550-si yaşlı olmaqla 4 062 dinc sakin yaralanıb.
 
Rusiya ordusunun Ukrayna ərazisindəki davranışları Beynəlxalq Cinayət Məhkəməsi tərəfindən araşdırılır. Məhkəmənin baş prokuroru Kərim Xan bildirib ki, o, mümkün hərbi cinayətləri araşdırmaq üçün 42 müstəntiq, səhiyyə ekspertləri və digər mütəxəssislərdən ibarət qrup göndərib. 
 
Azərbaycan daxil olmaqla, BMT üzvlərinin mütləq əksəriyyəti Krım yarımadası və Donbası Ukraynanın ərazisi olaraq tanıyır.


Aytac Zeynalova