Rusiyanın Severodonetksə hücum etdiyi deyilir - Ziddiyətli açıqlamalar

Luhansk vilayətinin qubernatoru sahənin Ukraynanın nəzarəti altında olduğunu bildirir.

Qubernator Sergey Qayday Azot zavodunda 300-400 ukraynalı döyüşçü və yüzlərlə mülki əhalinin ilişməsini ruspərəst "yalan” adlandırıb.

 

Qaydayın sözlərinə görə, Rusiya ordusu ötən sutka ərzində Severodonetskə gedən 3 körpüdən ikisini dağıdıb.

"Gecə ruslar rayon mərkəzinə aparan ikinci körpünü dağıtdılar, hazırda şəhərə gedən sonuncu üçüncü keçidi artilleriyadan kütləvi şəkildə atəşə tuturlar. Ruslar Severodonetski ilə ətraf əlaqəni kəsmək üçün bütün güclərini sərf edirlər. Növbəti iki-üç gün əhəmiyyətli olacaq. Biz başqa istiqamətlərdə, yəni rusların nəzarət altına almağa çalışdığı Lisiçansk-Baxmut magistralında hücumu istisna etmirik”, - Luqansk OVA-nın rəhbəri Sergey Qayday Telegram kanalında yazır.

Rusiya artıq Luhansk ərazisinin 97 %-nə nəzarət etdiyini iddia edir. Amma müharibədən öncə 100,000 əhalisi olan Severodonetsk sənayə şəhərinin ələ keçirilməsi Rusiyanın Donbas ərazisinə nəzarət etmək üçün strateji əhəmiyyət daşıyır.

Luqansk vilayət administrasiyasının səhər xəbərlərində qeyd olunur ki,Rubijnedə Ukrayna ordusu Rusiya tərəfdə vuruşan çeçenlərə məxsus komanda məntəqəsini dağıdıb. Məlumatda son günlər Kadievkadakı stadionda yerləşən "Vaqner" döyüşçülərinin və Severodonetskdəki Rusiya ordu komanda mərkəzlərinin dağıdıldığı bildirilir.

Rusiya fevralın 24-də Ukraynaya hücum edib. Bu müddət ərzində ölkənin bir sıra şəhər və qəsəbələri dağıdılıb, minlərə adam həlak olub, milyonlarla insan ölkədən qaçqın düşüb.

Beynəlxalq aləm Rusiyanın bu addımını pisləyir və qoşunlarını Ukraynadan çıxarmağa çağırır.

Rəsmi Moskva isə qonşu Ukraynaya qarşı apardığı müharibəni "xüsusi hərbi əməliyyat" adlandırır. Bundan başqa "müharibə" sözündən istifadə edənlər, "müharibəyə yox" deyənlər, o cümlədən Rusiya müdafiə nazirliyinin rəsmi məlumatlarından fərqli xəbərlər verən fərdlər və KİV-lər cəzalandırılır.