Paşinyan sülh danışıqları aparmağa hazırdır - Sergey Lavrov

O, həmçinin vurğulayıb ki, rəsmi Moskva sərhədlərin delimitasiyası və demarkasiyası üzrə Azərbaycan və Ermənistan komissiyalarının işi ilə bağlı Bakı və İrəvana məsləhətləşmələr verməyə hazırdır. 

"Biz həmçinin digər sazişlərə uyğun olaraq Azərbaycan və Ermənistan sərhədlərinin delimitasiyası və demarkasiyası üçün yaradılmış iki komissiyanın işi üzrə məsləhət xidmətləri göstərməyə hazırıq. Bununla bağlı konkret təkliflər var. Mən onları sizinlə  müzakirə etməkdən məmnunam”, - Lavrov bildirib.

Onun sözlərinə görə, kommunikasiyaların açılması üzrə üçtərəfli işçi qrupun işində "müəyyən irəliləyiş” var.

"Biz 2020-ci ilin noyabrında üç dövlətin liderləri tərəfindən imzalanmış  sənədin həyata keçirilməsini asanlaşdırmaq üçün mümkün olan hər şeyi etməyə hazırıq. Bizim qiymətləndirməmizə görə, kommunikasiyaların açılması üzrə üçtərəfli işçi qrupun fəaliyyətində müəyyən irəliləyiş var”, - Lavrov vurğulayıb.

Bu kontekstdə nazir süni maneələrin qarşısını almaq üçün avtomobillərin ən rahat hərəkəti üçün nəqliyyat kommunikasiyaları ilə bağlı məsələlərin Ermənistan tərəfi ilə razılaşdırılmasını zəruri hesab etdiyini deyib.

"Məncə avtomobillərin hərəkəti zamanı süni maneələrin yaradılmaması  üçün bu işin təşkili problemini necə həll etmək barədə ümumi fikir formalaşır. Nəticələr əldə olunana qədər Rusiya buna kömək edəcək”, - Lavrov  bildirib. 

Rusiya Xarici İşlər Nazirliyinin rəhbəri həmçinin qeyd edib ki, Moskva Bakı ilə İrəvan arasında sülh sazişinin imzalanması ilə bağlı danışıqlar məsələsində kömək etməyə hazırdır.

Lavrov həmçinin  Azərbaycanın və Rusiyanın iştirak etdiyi digər beynəlxalq forumlar – həm BMT, həm ATƏT, həm də "Xəzər beşliyi”  çərçivəsində əməkdaşlığın genişləndirilməsinin tərəfdarı olduğunu deyib.