Azərbaycan və Qırğızıstan arasında yeni şura yaradılır

Azərbaycan və Qırğız Respublikaları arasında dövlət başçıları səviyyəsində Dövlətlərarası Şura təsis ediləcək.
 
Bu, Milli Məclisin plenar iclasında müzakirə edilən "Azərbaycan Respublikası və Qırğız Respublikasının Dövlətlərarası Şurasının yaradılması haqqında” Memorandumun təsdiq edilməsi barədə” qanun layihəsində əksini tapıb.
 
Parlament Memoranduma əlavə olunan "Azərbaycan Respublikası və Qırğız Respublikasının Dövlətlərarası Şurası haqqında Əsasnamə”ni də təsdiq edəcək. Əsasnaməyə əsasən, Dövlətlərarası Şuraya dövlət Başçıları rəhbərlik edəcək. Şuranın tərkibinə hökumətlərin başçıları daxildirlər. Şuranın iclaslarında Azərbaycan və Qırğız Respublikalarının hökumətlərinin üzvləri, həmçinin dəvət olunan şəxslər (razılaşdırmaqla) iştirak edə bilərlər. Dövlətlərarası Şura zəruri olduğu təqdirdə daimi və müvəqqəti əsasda İşçi Qruplar yarada bilər. Dövlətlərarası Şuranın sədri dövlət başçıları başqa cür qərar qəbul etmədiyi təqdirdə ərazisində növbəti iclasın keçirildiyi dövlətin başçısıdır. Şura öz iclaslarını ildə bir dəfədən az olmayaraq növbəli əsasda tərəflərin hər birinin ərazisində keçirir. Dövlət başçılarının tapşırığına əsasən, Şuranın iclasları tərəflərin hökumət başçılarının sədrliyi ilə də keçirilə bilər. Təxirəsalınmaz məsələlərin həlli üçün tərəflərin hər birinin təşəbbüsü ilə Şuranın növbədənkənar iclasları çağırıla bilər. Şura aşağıdakı funksiyaları həyata keçirir:
 
- Azərbaycan və Qırğız respublikaları arasında münasibətlərin inkişafının ən mühüm pinsipial məsələlərinə baxır;
 
- Münasibətlərin inkişaf strategiyasını, əsas istiqamətlərini və perspektivlərini müəyyən edir və əldə olunmuş razılaşmaların həyata keçirilməsinə yönələn qərarlar qəbul edir.
 
Şuranın fəaliyyətinin əlaqələndirilməsi tərəflərin xarici işlər nazirliklərinə həvalə olunur.
 
Məsələ səsverməyə çıxarılaraq qəbul edilib.

www.anews.az