Azərbaycanda qeyri-neft ixracı 19% artırıb

2022-ci ilin yanvar-avqustunda  Azərbaycandan qeyri-neft ixracı 1,9 milyard dollar təşkil edib ki, bu da 2021-ci ilin eyni dövrü ilə müqayisədə 19% çoxdur. Bu barədə İqtisadi İslahatların Təhlili və Kommunikasiya Mərkəzi məlumat yayıb. 


Mərkəzin məlumatına görə, hesabat dövründə kənd təsərrüfatı məhsullarının ixracının həcmi ötən ilin müvafiq dövrü ilə müqayisədə 13,1% artaraq 537,8 milyon dollar təşkil edib.


8 ayda kimya sənayesi məhsullarının ixracı 3 dəfə, alüminium və ondan düzəldilən məmulatların ixracı 66%, qara metallar və onlardan düzələn məmulatların ixracı 21,1% artıb.


2022-ci ilin avqustunda Azərbaycandan ixracın ümumi həcmi 3,7 milyard dollar təşkil edib. Qeyri-neft sektorunda ixrac 11,5% azalaraq 204 milyon dollar olub. 2022-ci ilin avqustunda ərzaq məhsullarının ixracı 21,5% artaraq  46 ,6 milyon dollar təşkil edib. Qeyri-ərzaq məhsulları ixracı isə  18,1% azalaraq 157,4 milyon dollara düşüb.


Ümumilikdə, 2022-ci ilin yanvar-avqustunda Azərbaycanın ixracı 26,2 milyard dollar təşkil edib.



www.anews.az