Kral oğlunu Uels şahzadəsi elan edib

Şahzadə Uilyam Kral III Çarlz və Uels şahzadəsi Diananın böyük oğludur. İndi o, Britaniya taxt-tacına birinci namizəddir. 

Anası vəfat edəndə onun 15 yaşı olub.  O, Şotlandiyanın Sent-Endryus Universitetinə daxil olub və orada hazırkı həyat yoldaşı Keyt Middltonla tanış olub. Cütlük 2011-ci ildə ailə həyatı qurub.

21-ci doğum günündə Uilyam Kraliçanın yoxluğunda rəsmi tədbirlərdə onu təmsil etmək səlahiyyətinə malik olmaq üçün Dövlət müşaviri təyin edilib. 

Uilyam və Keytin üç övladı var - Şahzadə Corc (iyul 2013-cü il təvəllüdlü), Şahzadə Şarlotta (2015-ci il təvəllüdlü) və Şahzadə Lui (2018-ci il təvəllüdlü).

Şahzadə Orduda, Kral Donanmasında və RAF-da hərbi təhsili başa vurub və sonra Şimali Uelsin Anglesey Vadisində RAF Axtarış və Xilasetmə pilotu kimi üç il təlim keçib.  O, həmçinin  Şərqi İngiltərədə təcili yardımın köməkçi pilotu kimi part-time işləyib. 

İndi Uels şahzadəsi titulu ilə birlikdə ona atası tərəfdən Kornuoll hersoqu titulu da keçib.  Son vaxtlara qədər o və həyat yoldaşı Keyt Kembric hersoqu və hersoginyası titullarını daşıyırdılar, uşaqları isə Kembric şahzadələri  adlanırdı.

Şahzadə Uilyamın taxt-tacın varisi kimi əsas vəzifələri Krala dəstək olmaq olacaq.