Qərb Rusiyaya qarşı ikinci cəbhə açmaq istəyir - millət vəkili

Qərb Rusiyaya qarşı ikinci cəbhə açaraq NATO qüvvələrini Ermənistanla sərhəddə yerləşdirmək istəyir. Bunu deputat Zahid Oruc Milli Məclisin bu gün keçirilən iclasında deyib.

"Ermənistan ərazilərinin ələ keçirilməsindən danışan Avroparlament, AŞPA və onlarla dövlətin Xarici İşlər Nazirlikləri, qlobal medianın apardığı kampaniya,  Avropa Birliyindən Ermənistana 40 nəfərlik hərbi taborun gəlməsi, dünən isə ATƏT-in kəşfiyyat missiyasının İrəvanda mənzillənməsi, 18 oktyabrdan İran ordusunun başlatdığı hərbi təlimlər bütövlükdə regionda silahlı toqquşmalara zəmin hazırlayır. Qərbin məqsədi Rusiyaya qarşı ikinci cəbhə açmaq, Ağdamda yerləşən Rusiya-Türkiyə hərbi mərkəzini bölgədən çıxarıb NATO qüvvələrini sərhəddə yerləşdirməkdir. İlham Əliyev Şuşa bəyannaməsini Ermənistana deyil, ölkəmizə və Türkiyəyə təhlükə törədən dövlətlərə qarşı imzalayıb. Qərbin hazırki mülki kontingenti İranın yanlış siyasətinə görə regiona gəlib. Son 30 ildə o bölgələrdə bir dəfə də olsun hərbi təlim keçirməyən bir dövlət Ermənistanın ərazi bütövlüyünü qoruyanda bilməliydi ki, bir gün qarşısında NATO emisarlarını görəcək”, - deputat bildirib.

"Bizim İranla dövlətlərarası sərhədlər müəyyənləşib, lakin kimsə Ermənistan kimi İranla da yeni sərhəd  istəyirsə, tarixi geriyə çevirər. Qoşunlarını sərhəddə yığıb oranı cəbhə xəttinə çevirmək Ermənistanı Qafqazın Ukraynasına, Yaxın Şərqin Suriyasına döndərər", - Zahid Oruc əlavə edib.   


www.anews.az