Maliyyə Nazirliyi 30 aylıq ofis icarəsi üçün 1,073 mln. AZN ödəyəcək

Azərbaycan Maliyyə Nazirliyi 30 ay müddətinə ofis icarəsi üçün 1.073.010 AZN ödəyəcək. Bu barədə tenderlərlə bağlı rəsmi elan saytında məlumat paylaşılıb.

Tenderin qalibi Əşrəf Səxavət oğlu Səfərov olub.

Tenderdə ofislərin ümumi sahəsi (əsas və yardımçı sahələr daxil olmaqla) minimum 1.500 m², təmirli və ZONA-8 ərazisində yerləşən binada olmalı, Əmlak Məsələləri Dövlət Xidməti tərəfindən verilmiş çıxarış və ya mülkiyyət sənədinə malik olmalıdır.

Ofislər daimi isti və soyuq su, işıq, istilik və soyutma sistemləri, generator, havalandırma, yanğınsöndürmə sistemləri ilə təchiz olunmalı, otaqların iç qapıları quraşdırılmış, divarlar boyalı və ya divar kağızlı olmalıdır. Binada 85-dən az olmayan otaq (rəhbər otaqları, iclas zalı, arxiv, mətbəx və s.), tualet və vanna otaqları, 6-dan az olmayan mətbəx, ən azı 1 sərnişin lift olmalıdır.

İcarəyə daxildir: istifadə edilmiş qaz, su, işıq və məişət tullantılarının daşınması. Digər xərclər icarə götürən tərəfindən ödəniləcək, bina icbari sığorta olunmalıdır.

Gülnar Nazimqızı