Azərbaycan gələn il BTC ilə neft ixracını artıracaq - Əliyev

"Gələn il Bakı-Tbilisi-Ceyhan neft kəməri ilə neft ixracı artacaq. Bununla paralel olaraq biz hazırda istifadə olunmayan Bakı-Supsa neft kəmərindən istifadə etmək istəyirik. Bu münasibətlə Gürcüstanın  baş naziri ilə müzakirələr apardıq. Buna böyük potensial və böyük ehtiyac var”, - Əliyev bazar ertəsi Tbilisidə Gürcüstanın baş naziri İrakli Qaribaşvili ilə birgə mətbuata bəyanatında bildirib.

Əliyev həmçinin bildirib ki, Gürcüstanın baş naziri ilə danışıqlar zamanı "gələcək enerji siyasəti” müzakirə olunub.

"Cənab Baş nazirin qeyd etdiyi kimi, həyata keçirilən layihələr uğurla işləyir və biz yeni layihələr haqqında düşünürük. Biz dünya bazarlarına qaz ixracını artırmağı planlaşdırırıq. Bu il ixracımız 22 milyard kubmetr təşkil edəcək, 2023-cü ildə daha da artacaq”, - Əliyev bildirib.

O, həmçinin bu ilin iyulunda imzalanmış Azərbaycan və Aİ arasında enerji sahəsində strateji tərəfdaşlıq haqqında memoranduma uyğun olaraq, 2027-ci ildə Azərbaycan qazının Avropaya ixracının 5 il ərzində iki dəfə artacağını xatırladıb.

 

"Beləliklə, 2027-ci ildə Azərbaycan qazının yalnız Avropaya ixracı 20 milyard kubmetrə çatacaq. Niyyətimiz bunlardır və bizim belə imkanlarımız var”, - deyə Əliyev bildirib.

Bakı-Tbilisi-Ceyhan neft kəmərinin uzunluğu 1768 km, o cümlədən Azərbaycanda 443 km, Gürcüstanda 249 km, Türkiyə ərazisində isə 1076 km-dir. Kəmərin buraxıcılıq qabiliyyəti ildə 50 milyon tondan artıq neftdir.

Layihə iştirakçıları: BP (30,1%); SOCAR (25%); MOL (8,9%); Equinor (8,71%); TPAO (6,53%); ENI (5%); Itochu (3,4%); ExxonMobil (2,5%); INPEX (2,5%), TotalEnergies (5%) və ONGC (2,36%).

2021-ci ildə BTC ilə vurulan neftin həcmi 26 milyon 421,5 min ton təşkil edib ki, bu da 2020-ci illə müqayisədə 3,9% azdır.

2022-ci ilin 9 ayı ərzində BTC boru kəməri ilə nəql edilən neftin həcmi 21 milyon 688,4 min ton (artım 10,8%) təşkil edib.

Hazırda BTC neft kəməri ilə "Azəri-Çıraq-Günəşli” yataqlar blokundan neft və "Şahdəniz” yatağından hasil edilən kondensat, həmçinin SOCAR nefti vurulur. BTC həmçinin Xəzər dənizi regionunun bir sıra digər ölkələrindən də neft nəql edir.

2020-ci il dekabrın 31-də Azərbaycan TAP vasitəsilə Avropaya - İtaliya, Yunanıstan və Bolqarıstana qaz nəqlinə başlayıb.

2021-ci ildə Azərbaycan Avropaya 8,2 milyard kubmetr qaz ixrac edib. 2022-ci ildə Azərbaycandan Avropaya qaz ixracı 11,5 milyard kubmetr proqnozlaşdırılır.

Bundan əlavə, Azərbaycan qazı Türkiyəyə (TANAP qaz kəmərləri və Cənubi Qafqaz Boru Kəməri, SKTM) və Gürcüstana (SKTM və Qazıməhəmməd-Qazax qaz kəməri ilə) ixrac edilir.

2021-ci ildə Azərbaycan 19 milyard kubmetr qaz ixrac edib.