ƏDV-nin qaytarılan məbləği 15%-dən 17,5%-ə kimi artırılacaq

Dəyişikliklərə əsasən, ticarət və xidmət obyektlərində nağdsız ödənişlər üzrə ƏDV-nin qaytarılması məbləğinin 15% 17,5%-ə qaldırılması təklif olunub. 

Eyni zamanda, ƏDV-nin qaytarılmalı olan məbləği nağd şəkildə ödənildikdə 10%-dən 5%-ə endirilib.

"Bu təklif nağdsız ödənişlərin stimullaşdırılmasına yönəlib", - qanunda göstərilib. 

Azərbaycanda ƏDV dərəcəsi hazırda 18% təşkil edir.

2020-ci ilin martında Azərbaycan Prezidenti İlham Əliyev "ƏDV-nin bir hissəsinin qaytarılması mexanizmi”ni təsdiqləyib. Mexanizmə əsasən, Azərbaycan vətəndaşları ticarət və ya iaşə obyektlərində ödəniş edərkən ƏDV-nin bir hissəsini 30 gün ərzində ala bilərlər.

Mexanizmə əsasən, ƏDV-nin qaytarılması xidmətindən istifadə etmək istəyənlər xüsusi portalda qeydiyyatdan keçməlidirlər. İstehlakçı satın alarkən satıcıdan nəzarət-kassa aparatının çekini və terminal nəzarət-kassa aparatına qoşulmadıqda POS terminaldan çıxarışı tələb etməlidir.

Portal 2020-ci ilin mayından istifadəyə verildiyi gündən indiyədək sistemdə 1,9 milyona yaxın istifadəçi qeydiyyatdan keçib.

Portal fəaliyyətə başlayandan indiyədək 771 milyon çekə görə ƏDV-nin qaytarılmış hissəsinin məbləği 319,9 milyon manat təşkil edib.