SOCAR-a büdcədən ayırmalar 54,2% artacaq
04.11.2022 12:09
Azərbaycan hökuməti Heydər Əliyev adına Bakı Neft Emalı Zavodunun (BNEZ) yenidən qurulması və modernləşdirilməsi üzrə işlərin davam etdirilməsi üçün 2023-cü il dövlət büdcəsindən 330 milyon manat vəsaitin ayrılmasını nəzərdə tutub. Bu barədə Maliyyə Nazirliyinin məlumatında bildirilir.
"2023-cü ilin dövlət büdcəsində BNEZ-nin yenidən qurulması üzrə işlərin davam etdirilməsi üçün 330 milyon manat (indiki məzənnə ilə 194,1 milyon ABŞ dolları) məbləğində vəsait nəzərdə tutulub”, - Maliyyə Nazirliyi bildirib.
Bu vəsait Azərbaycan Dövlət Neft Şirkətinə (SOCAR) ayrılacaq.
SOCAR-ın 2022-ci ilin dövlət büdcəsindən zavodun modernləşdirilməsi üçün 214 milyon manat (indiki məzənnə ilə təxminən 126 milyon dollar) aldığını nəzərə alsaq 2023-cü ildə bu məqsədlər üçün maliyyələşmənin həcminin 54,2% artacağını demək olar.
BNEZ hazırda genişmiqyaslı modernləşdirmə və yenidənqurma layihəsini həyata keçirir. Zavodun modernləşdirilməsi və yenidən qurulması layihəsinin birinci mərhələsi üzrə işlər 2023-cü ilin dekabrında başa çatacaq. Zavodun gücü ildə 6,5 milyon ton neft emal etməyə imkan verir, modernləşdirmə və yenidənqurma işlərinin nəticələrinə əsasən zavod Xəzər regionu ölkələrindən çıxarılan bütün növ neftlərin emalını təmin edə biləcək. Layihənin tam olaraq 2027-ci ildə tamamlanacaq.
BNEZ SOCAR-ın tərkib hissəsidir.
N.Təbrizli
www.anews.az
Foto 
Video 
