Gələn il tədiyyə balansının profisiti ikirəqəmli olacaq

"2023-cü il üçün tədiyə balansının profisiti proqnozu dəyişməz olaraq qalır. Enerjinin cari qiymətləri qorunub saxlanılarsa, gələn il ÜDM-ə nisbətdə cari əməliyyatlar hesabının profisiti ikirəqəmli olacaq”, -  Mərkəzi Bankın faiz diapazonunun parametrləri ilə bağlı açıqlamasında bildirilib.

Mərkəzi Bank qeyd edib ki, 2022-ci ilin 10 ayı ərzində Azərbaycanın xarici ticarət profisiti 23,1 milyard dollar təşkil edib ki, bu da ötən ilin yanvar-oktyabrıı ilə müqayisədə 3,1 dəfə çoxdur.

2022-ci ilin yanvar-sentyabrında Azərbaycanın tədiyə balansının cari əməliyyatlar hesabının profisiti 17 milyard 710,6 milyon ABŞ dolları (2021-ci ilin 9 ayının göstəricisindən +4,5 dəfə) və ya ÜDM-in 30,7%-ni təşkil edib.

Yanvar-sentyabrda neft-qaz sektorunda müsbət saldo 21 milyard 447,7 milyon dollar (artım 2,6 dəfə), qeyri-neft sektorunda isə 3 milyard 737,1 milyon dollar (azalma 12,1%) olub.

2022-ci ilin yanvar-sentyabrında neftin orta qiyməti 2021-ci ilin 9 ayı üçün 61,9 dollar/barrelə qarşı 106,6 dollar/barrel təşkil edib. 

Azərbaycan Mərkəzi Bankı 2022-ci ilin sonuna tədiyyə balansının cari hesabında ÜDM-in 23-25%-i səviyyəsində profisit gözləyir.

2021-ci il üçün Azərbaycanın tədiyyə balansının cari əməliyyatlar hesabının profisiti 8 milyard 291,6 milyon dollar və ya ÜDM-in 15,2%-ni təşkil edib. Profisitə səbəb neftin qiymətinin yüksəlməsidir (2021-ci ildə neftin orta qiyməti bir il əvvəl 40,8 dollara qarşı 66,8 dollar/barrel olub).