Filippin ABŞ-a daha 4 hərbi bazaya giriş imkanı verəcək

Filippin ABŞ-a Genişləndirilmiş Müdafiə Əməkdaşlığı Sazişi (EDCA) çərçivəsində daha dörd hərbi bazaya giriş əldə etməyə icazə verəcək. Razılıq Pentaqonun rəhbəri Lloyd Ostin ilə onun filippinli həmkarı Carlito Galvez Jr arasında keçirilən görüşdə əldə olunub.

Pentaqonun rəhbərinin sözlərinə görə, saziş çərçivəsində ABŞ-a mövcud 5 bazadan əlavə 4 yeni bazaya giriş imkanı veriləcək. Beləliklə, ABŞ ordusu ümumilikdə 9 bazada yerləşdiriləcək.

"Bazalar hər iki ordunun hazırlıq səviyyəsinin yüksəldilməsi, humanitar məqsədlər üçün, eləcə də təbii fəlakətlərin nəticələrinin aradan qaldırılması üçün istifadə olunacaq”, - deyə Pentaqon rəhbəri bildirib.

Eyni zamanda, Ostin "ABŞ-ın Filippini dəstəkləmək öhdəliyi sarsılmazdır” deyən ABŞ prezidenti Co Baydenin sözlərini xatırladıb.

"Bizim ittifaqımız hər bir ölkənin demokratiyasına inam yaradır, azad və açıq Hind-Sakit okean regionunun saxlanmasına töhfə verir", - Ostin bildirib.

Onun sözlərinə görə, ikitərəfli müdafiə öhdəliklərinə Cənubi Çin dənizində və ya Filippin dənizinin qərbində iki ölkənin hərbi və digər obyektlərinə edilən hücumlara birgə cavab tədbirləri daxildir.


www.anews.az