Azərbaycan xidmətlərin ixracını artırmalıdır - Cabbarov

Azərbaycan xidmət ixracını artırmalıdır - Cabbarov

2022-ci ildə Azərbaycan dövlət büdcəsinin gəlirlərinin 50%-ni qeyri-neft sektoru təmin edib.Bu barədə iqtisadiyyat naziri Mikayıl Cabbarov bildirib.

"2022-ci ildə neft və qazın qiymətlərində müsbət dinamikanın çox yüksək olmasına baxmayaraq, Azərbaycanın dövlət büdcəsinin gəlirlərinin 50%-i qeyri-neft sektorunun payına düşür", - Cabbarov cümə günü "Heydər Əliyev və Azərbaycan vergisi" konfransındaçıxışı zamanı  bildirib. 

Qeyri-neft ixracının həcminə gəlincə, nazir bu istiqamətdə hələ görüləsi işlərin olduğunu vurğulayıb.

 

"Keçən il qeyri neft sektorunda göstərici 3 milyard dollara çatıb, lakin bizim ümumi ixracımızla  müqayisədə bu, çox da böyük göstərici deyil. Eyni zamanda dinamikaya nəzər salsaz, üç il əvvəl biz 1,7 milyard dollardan danışırdıq, indi isə 3 milyard dollara çatmışıq.Təbii ki, məqsədimiz bu yüksək templəri saxlamaqdır ”, - Cabbarov bildirib.

Onun sözlərinə görə, xidmət ixracının artırılması vacibdir. 

 

"Xüsusən də geosiyasi və geoiqtisadi dəyişikliklər baş verən zaman xidmət ixracı da bu məsələdə mühüm rol oynayır. Xüsusilə, Azərbaycanın bir çox ölkələr, xüsusən də Mərkəzi Asiya ölkələri üçün yeganə və dayanıqlı tranzit marşrutuna çevrilməsi maraq kəsb edir”, -  nazir vurğulayıb.

2022-ci ildə Azərbaycandan qeyri-neft ixracı rekord həddə - 3 milyard 47,7 milyon dollar təşkil edib ki, bu da 2021-ci illə müqayisədə 12,3% çoxdur.

2027-ci ilədək qeyri-neft ixracının 5 milyard dollar səviyyəsinə çatdırılması qarşıya məqsəd qoyulub.