Avropa İttifaqı Azərbaycan və Ermənistana müraciət edib

Bakı və İrəvan sərhədin delimitasiyası ilə bağlı danışıqları aktivləşdirməlidir, Avropa İttifaqı prosesi dəstəkləməyə hazırdır. Bu barədə Aİ Xarici İşlər Xidmətinin çərşənbə günü Brüsseldə Azərbaycan və Ermənistan sərhədində vəziyyətin gərginləşməsi ilə bağlı yaydığı bəyanatda deyilir.

"Əvvəlki öhdəliklərə, 2022-ci ilin oktyabrında Praqada əldə olunmuş öhdəliklərə, 1991-ci il Almatı Bəyannaməsinə əməl edilməlidir. Aİ həmçinin sərhədin delimitasiyası ilə bağlı danışıqların intensivləşdirilməsinə çağırış edir. Biz bu prosesi dəstəkləməyə hazırıq. Biz təmkinli olmağa və bütün mübahisələrin sülh yolu ilə həllinə çağırışlarımızı təkrarlayırıq. Aİ bu səyləri ən yüksək səviyyədə dəstəkləməyə davam edir", - bəyanatda bildirilib.

 

 

Ermənistan mətbuatı 4 hərbçinin şəhid olduğunu, 6 hərbçinin yaralanmasını yazır. 

Azərbaycan prezidenti İlham Əliyev çərşənbə günü ATƏT-in fəaliyyətdə olan sədri, Şimali Makedoniyanın xarici işlər naziri Buyar Osmani ilə görüşündə Ermənistanla sərhəddə dünən baş vermiş insidenti İrəvanın qəsdən törətdiyi təxribat kimi qiymətləndirib.

 

Azərbaycanın xarici işlər naziri Ceyhun Bayramov ATƏT-in fəaliyyətdə olan sədri, Şimali Makedoniyanın xarici işlər naziri Buyar Osmani ilə birgə keçirdiyi mətbuat konfransında Ermənistanın aprelin 11-də olan təxribatı  planlaşdırılmış şəkildə baş verdiyini bildirib.

Azərbaycanla Ermənistan arasında 2020-ci ilin noyabrında Rusiyanın iştirakı ilə üçtərəfli bəyanat imzalanıb. Bəyanata görə hərbi əməliyyatlar dayandırılıb. Rusiya sülhməramlıları müvəqqəti 5 il müddətinə Qarabağ ərazisinə yerləşdirilib. Sülhməramlıların müvəqqəti yerləşməsinə baxmayaraq Ermənistanla Azərbaycan arasında gərgin toqquşmalar bir dəfə baş verib.