Azərbaycanda aylıq əməkhaqqı ilə ev almaq mümkündürmü?

 
"Azərbaycanda minimal əmək haqqı təxminən 400, maksimal əmək haqqı isə bir neçə min manat və daha artıq təşkil edir. 10-11 illik əməkhaqqı ilə ev alan vətəndaşlar müəyyən kateqoriyadan olan insanlardır. Bir vətəndaş 10-15 il əməkhaqqının hamısını toplayıb ev ala bilər. Amma ümumən bu şəxslərin ailə üzvləri, kirayə, aylıq yaşam üçün lazım olan digər xərcləri var. Bu xərclər çıxıldıqda, yerdə qalan pul vəsaiti vətəndaşın kreditlə mənzil almağına bəs edərsə, həmin şəxslər ev ala bilərlər. Bu gün Azərbaycanda daşınmaz əmlakın qiymətləri kəskin bahadır və qiymətlər artan xətt uzrə davam edir. Ortalama ümumi sahəsi 30 kvadrat metr olan bir otaqlı ən ucuz evin qiyməti əmlak bazarında 90 min manata təklif olunur. Hansı ki, bu əmlaklar ipoteka predmetinə çevrilə bilmirlər. Yəni istismar müddətini bitiriblər. Mərkəzə yaxın ərazilərdə yeni tikili binada təmir olunmuş 55 kvadrat metr olan bir otaqlı mənzilin satış qiyməti isə təxminən 120-180 min manat aralığında dəyişir. Deməli bir şəxs bir otaqlı ev almaq üçün 25 il kredit ödəməlidir. Şəxsin ailə üzvlərinin sayı artıqca da, bu bir otaqlı mənzillər onlara bəs etmir. Bu cür layihələr 10-11 il ərzində o halda mümkün olar ki, sosial layihələr həyata keçirilə və torpaq sahələri dövlət tərəfindən ayrılsın. Necə ki, Mənzil İnşaatı Dövlət Agentliyinin satışa çıxardığı mənzillər var ki, qiymətləri əraziyə görə çox ucuzdur. Həmçinin bir müddət əvvəl məcburi köçkünlər üçün tikilmiş binalardakı mənzillər əmlak bazarında ucuz qiymətə satışa çıxarıldı. Aşağı qiymətə olmasının səbəbi isə həmin ərazilərdə tikilən binaların torpaq ərazilərinin dövlət tərəfindən ayrılması idi", - ekspert bildirib.
www.anews.az